(රන්ජන් කස්තුරි)

මෙරට ප්‍රධාන පෙළේ පොත් ප්‍රකාශන සමාගමක එජන්තවරයකු ලෙස පෙනී සිටිමින් දිවයිනේ විවිධ ප්‍රෙද්ශවල ව්‍යාපාරිකයන් ඇතුළු පිරිස් රවටා රුපියල් ලක්ෂ ගණනාවක මුදල් වංචා කළ බව කියන පුද්ගලයකු අත්අඩංගුවට ගැනීම සඳහා බදුල්ල පොලිසිය පරීක්ෂණ ආරම්භ කර තිබේ.

දිවයිනේ ප්‍රකට පොත් සමාගම්වල මුද්‍රණය කරන පොත් සහ පාසල් උපකරණ බෙදාහරින බවටත් ඒවා අලෙවි කරන ව්‍යාපාරිකයන්ට දිරිදීමනා සහ විශාල කොමිස් මුදල් ලබාදෙන බවත් පවසා එම පුද්ගලයා ඉකුත් දිනවල බදුල්ල ප්‍රෙද්ශයේ ව්‍යාපාරිකයන් කීපදෙනකුම රවටා ඇතැයි ද ඔවුන් බදුල්ල පොලිසියට කළ පැමිණිල්ලේ සඳහන්වේ.

පොත් අලෙවි කිරීම සඳහා ව්‍යාපාරික ස්ථානයේ දැන්වීම් පුවරුවක් සකස්කරදීමට රුපියල් 5000 ක්ද, ඡායාපිටපත් යන්ත්‍රයක් සහ රී-ලෝඩ් යන්ත්‍රයක් ලබාදීමට තවත් රුපියල් 5000 ක්ද ආදී වශයෙන් ඔහු එම ව්‍යාපාරිකයන්ගෙන් ලබාගෙන ඇතැයි ද පොලිසිය කියයි.

මෙම පුද්ගලයා ප්‍රෙද්ශයෙන් ප්‍රෙද්ශයට ගොස් ජංගම දුරකතන අංක වෙනස් කරමින් විවිධ මට්ටමේ ව්‍යාපාරිකයන් රවටමින් ඔවුන්ගෙන් මුදල් වංචාකරමින් සිටි බවද පොලිසිය කියයි. 

කොළඹ ප්‍රසිද්ධ පොත් ප්‍රකාශන සමාගමක්ද එම පුද්ගලයාට එරෙහිව බදුල්ල පොලිසියට පැමිණිලි කර තිබේ.