යොහාන් භාසුර

නියඟය හේතුවෙන් ජලවිදුලි ජනනය පහත බැසීම නිසා තාප විදුලි නිෂ්පාදනයට දිනකට රුපියල් කෝටි 80 ක පමණ අමතර මුදලක් වැය කිරීමට සිදුවී ඇති බව ලංකා විදුලිබල මණ්ඩලයේ උසස් නිලධාරියෙක් පැවැසීය.

සාමාන්‍ය වර්ෂාපතනයක් පවතින කාලයේ දිනකදී තාප විදුලිය සඳහා රුපියල් කෝටි 80 ක් පමණ වැය වන බවත් මේ දිනවල එම වියදම   දෙගුණයකිනන් වැඩි වී ඇති බවත් එම නිලධාරියා කීය.

ජලාශවල ජල මට්ටම සීග්‍රලෙස අඩුවීම හේතුවෙන් ජල විදුලි ජනනය සියයට 15 ක් පමණ දක්වා පහළ ගොස් ඇති අතර මේ සමස්ත විදුලි සැපයුමෙන් සියයට 85 ක් තාප විදුලියෙන් ලබාගන්නා බවද එම නිලධාරියා සඳහන් කළේය.

බලාගාර ආශ්‍රීත ජලාශවල ජල ධාරිතාව සියයට 20 ක් පමණ දක්වා පහළ ගොස් ඇති බවත්, රන්දෙණිගල ජලාශයේ ධාරිතාව සියයට 8 ක් දක්වාද වික්ටෝරියා ජලාශයේ ධාරිතාව සියයට 27 ක් දක්වා සහ සමනල වැව ජලාශයේ ධාරිතාව සියයට 1.9 දක්වා ද පහළ ගොස් ඇති බවත් ඔහු කීවේය.

මේ අනුව මෙරට සමස්ත විදුලි ඉල්ලුමෙන් සියයට 85 ක් ගල්අඟුරු සහ තාප බලාගාරවලින් සපුරා ගන්නා බවද එම නිලධාරියා සඳහන් කළේය.

ඒ හේතුවෙන් විදුලිබල මණ්‍ඩලයට අමතර විශාල පිරිවැයක් දැරීමට සිදුව ඇති බවද ඔහු පැවැසීය.

මේ අතර සමනල වැව සිඳීයාම නිසා මෙගාවොට් 100 ක ප්‍රමාණයක් පෞද්ගලික අංශයෙන් මිලදී ගැනීමට විදුලිබල මණ්ඩලයට මේ වන විට මිල ගණන් කැඳවා ඇත.