(ෂේන් සෙනෙවිරත්න,ජේ.ඒ.එල් ජයසිංහ, රංජිත් රාජපක්ෂ සහ සුදත් එච්. එම් හේවා)

දිවයිනටම බලපා ඇති දැඩි වියලි කාලගුණික තත්ත්වය හේතුවෙන් මේ වන විට රන්දෙණිගල, මාඋස්සකැලේ සහ කාසල්රී ජලාශවල ජල මට්ටම ඉතා සීඝ්‍රයෙන් පහළ බැස ඇතැයි ජලාශ බාර නිලධාරිහු පවසති.

මාවුස්සකැලේ ජලාශයේ ජල මට්මට පහළ බැසීමත් සමග පැරණි මාවුස්සාකැලේ පැරණි නගරය මතු වී ඇති අතර එහි පිහිටි පැරණි විහාරස්ථාන, කොවිල් හා පල්ලි යළි මතුව ඇත. ඒවා වැඳපුදා ගැනීමට විශාල පිරිසක් පැමිණෙති.

මාවුස්සාකැලේ ජලාශයේ ජල මට්ටම පිටාර මට්ටම අඩි 120කි. මේ වන විට එය සිට අඩි 39.09 දක්වා පහළ බැස ඇත. මාවුස්සකැලේ මුළු ජල ප්‍රමාණය අක්කර අඩි 95400ක් වන අතර කැනියෝන්, ලක්ෂපාන, නව ලක්ෂපාන සහ පොල්පිටිය යන ජලවිදුලිබලාගාර සඳහා ප්‍රධාන වශයෙන් ජලය සැපැයෙන්නේ මාවුස්සාකැලේ ජලාශයෙනි.

කාසල්රී ජලාශයෙන් විමලසුරේන්ද්‍ර ජලාශයට සහ පොලිපිටිය යන ජලාශ දෙකකට ජලය සපයයි. කාසල් රී ජලාශයේ පිටාර මට්ටම අඩි 155ක් වන අතර එය මේ වන විට අඩි 42දක්වා පහළ බැස ඇත.

රන්දෙණිගල ජලාශයේ මුළු ජල ධාරිතාව ඝන මීටර් කෝටි 80 වන අතර (ඝනමීටර් මිලියන 800) මේ වන විට එහි මුළු ජල ධාරිතාව ඝන මීටර් කෝටි 30 දක්වා පහළ බැස ඇතැයි එහි උසස් නිලධාරියෙක් පැවැසීය. රන්දෙණිගල ජලාශයෙන් සාමාන්‍යයෙන් මෙගා වොට් 120ක විදුලියක් නිපදවන අතර මේ වන විට ජලය අඩුවීම නිසා ගිගා වොට් පැය 1කට සීමා වී ඇත.

රන්දෙණිගල ජලාශයට ප්‍රධාන වශයෙන් ජලය සැපයනුයේ වික්ටෝරියා ජලාශයෙනි. රන්දෙණිගල ජලාශයෙන් විදුලි උප්පාදනයට යොදා ගන්නා ජලය රන්ටැඹේ ජලායට මුදා හරින අතර රන්ටැඹේ ජලාශයෙන් පිටවන ජලය මිනිපේ අමුණ දක්වා පැමිණි එතැනින් වම් ඇළ සහ දකුණු ඇල වශයෙන් දෙකට බෙදී වම් ඇළ මහියංගනය දක්වා ගමන් කර කුඹුරු පෝෂණය කරයි. දකුණු ඇළෙන් ගමන් ගන්නා ජලය උල්හිටිය සහ මාදුරු ඔය හරහා කුඹුරු පෝෂණය කරයි.