(බිමල් ශ්‍යාමන් ජයසිංහ සහ නිමාලි කහවල)

හඳපාන්ගොඩ සමෘද්ධි  බැංකුවෙන් සමෘද්ධි සහනාධාරය ලබා ගැනීම සඳහා යමින් සිටි වයෝවෘද්ධ කාන්තාවක් බැංකුව ඉදිරිපිට දීම තරුණයෙකු පැද වූ යතුරුපැදියක ගැටීමෙන් මියගොස් ඇතැයි ඉංගිරිය පොලීසිය කියයි.

අනතුරින් මියගොස් ඇත්තේ හඳපාන්ගොඩ අරකාවිල  අංක 41 ලිපිනයේ පදිංචිව සිටි මල්ලිකා  ආරච්චිගේ  ලිලා හංසවතී නැමැති 68 හැවිරිදි වයෝවෘද්ධ කාන්තාවකි.

මියගිය කාන්තාව පාදුක්ක සිට  හඳපාන්ගොඩ දක්වා ධාවනය වන  බස් රථයේ නැග සමෘද්ධි බැංකුව ඉදිරිපිට බස් නැවතුමෙන් බැස බැංකුව දෙසට යාම සඳහා ප්‍රධාන මාර්ගය හරහා මාරු වීමේදී හඳපාන්ගොඩ  සිට පාදුක්ක දෙසට ධාවනය වෙමින් තිබූ  යතුරුපැදියේ ගැටී මෙම අනතුර වී ඇති බව පොලීසිය කියයි.

සිදුවූ අනතුරෙන් බරපතල තුවාල ලද කාන්තාව 1990 සුවසැරිය ගිලන් රථය මගින් හොරණ  මූලික රෝහලට ඇතුළත් කිරීමෙන් අනතුරුව පැය හතරකට පමණ පසු මියගිය බව රෝහල් ප්‍රකාශකයෙක් පැවසීය.

සිදුවූ අනතුරෙන් යතුරු පැදිකරු වන හඳපාන්ගොඩ කුරණ පදිංචි 19 හැවිරිදි තරුණයකු  තුවාල ලබා ඇති අතර ඔහු  ඉංගිරිය රෝහලේ වාට්ටු අංක එකේ ප්‍රතිකාර ලබා  වැඩිදුර ප්‍රතිකාර සඳහා හොරණ මූලිකව රෝහල වෙත ඇතුළත්ව නේවාසිකව ප්‍රතිකාර ලබන බව පොලිසිය සඳහන් කරයි.

සැකකාර තරුණයාට රියදුරු බලපත්‍රයක් නොමැති බවට අනාවරණය වී අතර පියාට අයත් යතුරු පැදිය ඔහු පදවා ඇති බව පොලිස් විමර්ශනවලදී අනාවරණය වී ඇත.