(සුජිත් හේවාජුලිගේ සහ අංජුල මහික වීරරත්න)

පාර්ලිමේන්තුව ආවරණය සඳහා විද්‍යුත් හා මුද්‍රිත මාධ්‍යය ආයතන විසින් නම් කෙරුණු සියලුම මාධ්‍යවේදීන්ට එම ආවරණ කටයුතු සඳහා අවසර දීමට තීරණය කර ඇතැයි වේත්‍රධාරී නරේන්ද්‍ර ප්‍රනාන්දු මහතා පැවැසීය.

කොවිඩ් පැතිරීම ඉහළ යෑමත් සමග පාර්ලිමේන්තු රැස්වීම් ආවරණය සඳහා අවසර දෙනු ලැබුවේ සෑම මාධ්‍ය ආයතනයකින්ම එක් මාධ්‍යවේදියකුට පමණි.

පාර්ලිමේන්තු ආවරණය කරන එන්නත් මාත්‍රා දෙකම ලබා ගත් සියලුම මාධ්‍යවේදීන්ට මේ අනුව ඉදිරි පාර්ලිමේන්තු රැස්වීම් ආවරණය සඳහා අවසර හිමි වනු ඇත.

පාර්ලිමේන්තු ආවරණයට නම් කෙරුණු සියලුම මාධ්‍යවේදීන්ට අයවැය යෝජනාවලිය ඉදිරිපත් කිරීමේ අවස්ථාව මෙන්ම ඉදිරි අයවැය යෝජනා විවාදද ආවරණය කිරීමට මේ අනුව හැකිවනු ඇතැයි පාර්ලිමේන්තු නිලධාරීහු පවසති.

මාධ්‍යවේදීන්ට පණවා තිබූ සීමා මෙසේ ඉවත් කිරීමට තීරණය කර ඇත්තේ කොවිඩ් පැතිරීම අඩුවීම සැලකිල්ලට ගෙන යැයි එම නිලධාරීහු වැඩිදුරටත් සඳහන් කරති.

පාර්ලිමේන්තු මන්ත්‍රීවරුන්, ආරක්ෂක අංශ නිලධාරීන්, පාර්ලිමේන්තු සේවකයන් හා ජනමාධ්‍යවේදීන් ඇතුළු පනහකට ආසන්න පිරිසක් කොවිඩ් රෝගයට පසුගිය කාලයේදී ගොදුරුවූහ.