(සමන්ත යහම්පත්)

මහාචාර්ය එදිරිවීර සරච්චන්ද්‍ර මහතාගේ ‘‘මනමේ‘‘ වේදිකා නාට්‍යයේ  පුරා අඩ සියවසක් පොතේ ගුරු චරිතය රඟපෑ ශ්‍යමන් ජයසිංහ මහතා ඕස්ට්‍රේලියාවේදී අභාවප්‍රාප්ත විය.

මිය යනවිට 78 වැනි වියේ පසුවූ ඔහු ඕස්ට්‍රේලියාවේ පොත් ව්‍යාපාරයක නියැලී සිටි ඇත. ශ්‍යාමන්ගේ අභාවයත් සමග මනමේ මුල් නාටකයේ ප්‍රධාන භූමිකාව රඟපෑ චරිත අතරින් ඉතිරිවී සිටි අවසන් චරිත ද අවසන් විය.

1956 වර්ෂයේදී පේරාදෙණිය සරසවියේ ශිෂ්‍යයකු ලෙස මහාචාර්ය සරච්චන්ද්‍රයන්ගේ ‘‘මනමේ‘‘ නාට්‍යයේ  පොතේ ගුරු චරිතයට පණ පෙවූ ශ්‍යාමන් පුරා වසර 50ක් එම චරිතයට ජීවය දීම විශේෂත්වයකි.

මංගල දර්ශනයේ රඟපාමින් වසර 50කට පසුවත් එම චරිතය නිරූපණය කළ එකම ශ්‍රී ලංකික වේදිකා නාට්‍ය ශිල්පියා ලෙස ඔහු නාට්‍ය ඉතිහාසයට එක් වේ.

1957 දී පේරාදෙණිය සිංහල සංගමයේ සභාපති ලෙස පත් වූ ශ්‍යාමන් ,මහාචාර්ය සරච්චන්ද්‍රෙග් ‘‘කදාවළලු, ප්‍රේමතෝ ජායතී සෝකෝ‘‘, වැනි නාට්‍යවල ද රංගනයෙන් දායක විය. පසුකලෙක ඔහු දයානන්ද ගුණවර්ධන මහතාගේ ‘‘නරි බෑණා‘‘ නාට්‍යයේ  පොතේ ගුරු ලෙස ද රංගනයෙන් දායකවීම විශේෂත්වයකි. 

කොළඹ ශාන්ත ජෝශප් විද්‍යාලයෙන් අධ්‍යාපනය ලැබ පේරාදෙණිය විශ්ව විද්‍යාලයේ දර්හනය පිළිබඳව උපාධිය ද හිමිකරගත් ශ්‍යාමන් පසු කළෙක  ශ්‍රී ලංකා පරිපාලන සේවයට එක්විය. ඔහු 1994 දී කම්කරු අමාත්‍යංශයේ ලේකම්වරයා ලෙසද කටයුතු කර විශ්‍රාම ගැනීමෙන් පසු සිය දරුවන් දෙදෙන සමඟ ඕසට්‍රේලියාවේ පදිංචියට ගියේය. අවසන් කටයුතු පසුව දැනුම් දෙන ඇත.