2021 මැයි මස 12 වන බදාදා
(මුදිතා දයානන්ද)
ආණ්ඩුවට මාස දෙකක් යන්නත් කලින් වියත් මගත්, මහින්ද රාජපක්ෂ අගමැතිගේ කණ්ඩායමත්, ශ්‍රී ලංකා නිදහස් පක්ෂයේ කණ්ඩායමත් නව ආණ්ඩුව තුළ තම තමන් නියෝජනය කරන කණ්ඩායම්වල බලය තහවුරු කරගැනීමේ ගැටුම පටන් අරන් යැයි එක්සත් ජාතික පක්ෂ පාර්ලිමේන්තු මන්ත‍්‍රී මුජිබර් රහුමාන් මහතා අද (12) පැවසීය.
ඔහු මේ බව සඳහන් කළේ පිටකෝට්ටේ පිහිටි සිරිකොත කාර්යාලයේ දී පැවති මාධ්‍ය හමුවකදි අදහස් දක්වමිනි.
එහිදි තවදුරටත් ඔහු මෙසේද පැවසීය.
මේ මාසයේ 17 වෙනිදාට ආණ්ඩුවට මාස දෙකයි. ඔවුන් ලබපු ඡන්ද ප‍්‍රමාණයට, ඒ වෙනුවෙන් ජනතාවට දුන්න පොරොන්දු ප‍්‍රමාණයට අනුව සළකා බැලූවාම මේ කාලය තුළ කරපු දෙයක් නැහැ. ජීවන බර අඩුකරනවා කිව්වා, වැටුප් ඒ කිසිවක් ඉටුකළේ නැහැ. මේ මාස දෙක තිස්සේම ඔවුන් සැලසුම් කළේ එක්සත් ජාතික පෙරමුණේ හිටපු මැති ඇමැතිවරු අත්අඩංගුවට ගන්නා ආකාරයයි. ඔවුන් හිරේ දාන ආකාරයයි.
වියත් මග තමයි අද ගෝඨාභ්‍ය රාජපක්ෂ ජනාධිපතිට උපදෙස් දෙන්නේ. හිටපු හමුදාපති, දැන් වරායේ සභාපති කියනවා අට පාස් එය පාර්ලිමේන්තුවට එවන්න එපා කියලා. එතුමා කාටද මේ කියන්නේ. ඒ ගැන අපිත් දැනගන්න අවශ්‍යයි. ආණ්ඩුවේ ඉන්න අටපාස් නැති අය කැබිනට් එකේ ඉන්න අටපාස් අය කවුද කියල අපිටත් දැනගන්න අවශ්‍යයි.
මේ ආණ්ඩුව බලයට ගෙනාපු වියත් මගේ අය මහමැතිවරණයේදි ඡන්දේ ඉල්ලන්න හදනවා. මහින්ද රාජපක්ෂ මහතාගේ කන්ඩායමත් තමන්ගේ බලය තහවුරු කරගන්න හදනවා. ඒ අතරේ ශ්‍රී ලංකා නිදහස් පක්ෂයත් ඊළග පාර්ලිමේන්තුවේ තමන්ගේ බලය හදාගන්නේ කෙසේද කියලා සැලසුම් කරමින් ඉන්නවා. දයාරත්නායක මහතා අටපාස් අය පාර්ලිමේන්තු එවන්න එපා කියන එකෙන් යම් ඉගියක් දෙන්නේ වියත් මගේ අය පාර්ලිමේන්තුවට එවන්න කියන එකයි. ඒ නිසා අද වැඩියෙන්ම අර්බුදයට පත්වෙලා තියෙන්නේ එජාපය නෙවෙයි ආණ්ඩුවයි.
