(මනෝප්රිය ගුණසේකර)

පාස්කු ඉරුදින ෂැංගිලා සහ සිනමන් ග්රෑන්ඩ් හෝටල් වලට මරාගෙන මැරෙන බෝම්බ ප්‍රහාර එල්ල කළ ස්වයං ඝාතක  ඉන්සාෆ් අහමඩ් හා ඉල්ලාම් අහමඩ් ත්‍රස්ත සහෝදරයින්ගේ පියාට සහ  සහෝදරයින් දෙදෙනෙකුට එරෙහිව පවරා ඇති නඩුවේ පූර්ව නඩු විභාග සම්මන්ත්රණය ලබන වසරේ ජනවාරි 27 වැනිදා පැවැත්වීමට කොළඹ මහාධිකරණ විනිසුරු නවරත්න මාරසිංහ මහතා අද (21) නියම කළේය.

නඩුව කැඳවූ අවස්ථාවේදී ඉදිරිපත් වු කරුණ සලකා බැලීමෙන් අනතුරුව විනිසුරුවරයා එලෙස නියම කළේය.

2019 වසරේ අප්රේල් මස 21 වන පාස්කු ඉරුදින ත්‍රස්ත ප්‍රහාරයක් එල්ල වන බවට සහ ඒ හරහා ජාතිවාදී කෝලාහල ඇති විය හැකි බවට තොරතුරු දැන සිටියදී ඒ පිළිබඳව පොලිස් නිලධාරියෙකුට දැනුම් නොදී තොරතුරු වසන් කිරීම ඇතුළු චෝදනා මත විත්තිකරුවන්ට එරෙහිව නීතීපතිවරයා චෝදනා නඟා ඇත.

පොලිස් නිලධාරියෙකුට දැනුම් නොදී සිටීමෙන් ත්‍රස්තවාදය වැළැක්වීමේ පනත යටතේ සහ දණ්ඩ නීතී සංග්‍රහය යටතේ දඬුවම් ලැබිය යුතු වරදක් කළ බවට විත්තිකරුවන්ට එරෙහිව නීතීපතිවරයා චෝදනා නඟා ඇත.

මෙලෙස චෝදන ලැබ සිටින්නේ දෙමටගොඩ මහවිල උද්යානයේ  පදිංචි කෝටිපති ව්‍යාපාරික මොහොමඩ් යුසුප් මොහොමඩ් ඊබ්රාහිම් හා ඔහුගේ පුතුන් වන මොහොමඩ් හිජාස් අහමඩ් හා මොහොමඩ් ඊබ්රාහිම් ඉස්මයිල් අහමඩ් නමැත්තන්ටය.

මෙම සිද්ධිය සම්බන්ධයෙන් සැකපිට අත්අඩංගුවට ගෙන වසර 03ක් පමණ රිමාන්ඩ් බාරයේ රඳවාගෙන සිටි කෝටිපති ව්යාපාරික මොහොමඩ් යුසුප් මොහොමඩ් ඊබ්රාහිම් හා ඔහුගේ පුත් මොහොමඩ් හිජාස් අහමඩ් නමැත්තන්ට මීට පෙර අවස්ථාවකදී කොන්දේසි සහිත ඇප මත මුදා හරිනු ලැබුවත් මොහොමඩ් ඊබ්රාහිම් ඉස්මයිල් අහමඩ් නමැති විත්තිකරු මේ වන විටත් රිමාන්ඩ් බරයේ පසුවේ.

නඩුව කැඳවනු ලැබු අවස්ථාවේදී ඇප මත මුදාහැර සිටින මොහොමඩ් යුසුප් මොහොමඩ් ඊබ්රාහිම්, මොහොමඩ් ඉජාස් අහමඩ්, අධිකරණයේ පෙනී සිටිය අතර තෙවැනි විත්තිකාර මොහොමඩ් ඊබ්රාහිම් ඉස්මයිල් අහමඩ් බන්ධනාගාර නිලධාරීන් විසින් අධිකරණයට ඉදිරිපත් කරන ලදී.

නඩුවේ තෙවැනි විත්තිකරු වන ඉබ්රායිම් ස්මයිල්ට ඇප නියම කරන්නැයි ඔහුගේ නීතීඥයින් කළ ඉල්ලීම සම්බන්ධයෙන් කරුණු සලකා බැලීම සඳහා මෙම නඩුව කැඳවනු ලැබු අවස්ථාවේදී විත්තිකාර ඉබ්රායිම් ස්මයිල් නමැත්තා අසනීප තත්ත්වයක පසුවන බව දැනුම් දුන් ඔහුගේ නීතීඥයින් ඒ සම්බන්ධයෙන් වූ වෛද්‍ය වාර්තා අධිකරණයට ඉදිරිපත් කළේය.

ඉදිරිපත් වු කරුණු සලකා බැලීමෙන් අනතුරුව මෙම නඩුවේ පූර්ව නඩු විභාග සම්මන්ත්රණය ලබන වසරේ ජනවාරි 27 වැනිදා පැවැත්වීමට තීරණය කළ මහාධිකරණ විනිසුරුවරයා එදින මෙම නඩුව යළි කැඳවීමට නියම කළේය.