(සුජිත් හේවාජුලිගේ සහ  අංජුල මහික වීරරත්න)

පාර්ලිමේන්තුවේ මාසික විදුලි බිල රුපියල්  ලක්ෂ හැටක් බව සමගි ජන බලවේගයේ ගම්පහ දිස්ත්‍රික් මන්ත්‍රී අජිත් මාන්නප්පෙරුම පාර්ලිමේන්තුවේදී අද (20)  පැවසීය.

ඔහු මෙසේ පැවසුවේ  පුනර්ජනනීය බලශක්ති ව්‍යාපෘති සම්බන්ධයෙන්  විදුලිබල හා බලශක්ති ඇමැති කංචන විජේසේකර මහතාට  ප්‍රශ්නයක් යොමු කරමිනි.

විදුලි බිල අඩු කිරීමට අදාළව අදහස් පළවෙමින් ඇති  බවත් මේ මොහොතේ රටට ආදර්ශයක් වශයෙන්  පාර්ලිමේන්තුවේවිදුලි  බිල අඩු කිරිම සඳහා සූර්ය බලයෙන්  විදුලිය  ලබාදීමේ ව්‍යාපෘතියක් ආරම්භ කළ යුතු බවත්  මන්ත්‍රීවරයා සඳහන් කළේය.

විදුලිබල හා බලශක්ති ඇමැති කංචන විජේසේකර මහතා:

පාර්ලිමේන්තුවේ විදුලි බිල අඩු කිරිම අවශ්‍යයි. පාර්ලිමේන්තු වහලේ සූර්ය පැනල සවි කිරිම ගැටලුවක් නම් පාර්ලිමේන්තුවට අයත් වෙනත් ඉඩමක සූර්ය පැනල සවි කර විදුලිය ලබා ගැනීමේ යෝජනාවක් මණ්ඩලය ඉදිරිපත් කර තිබෙනවා.

ඒ වගේම රෝහල්වල වහල මත සූර්ය පැනල සවි කිරීම මේ වසරේ අවසන් කරනවා. පාසල්වලත් පළාත්සභා ගොඩනැගිලිවලත් සූර්ය පැනල සවි  කිරීමේ කටයුතු පටන් අරගෙන තිබෙනවා.  සූර්ය පැනල සවි කිරිම සඳහා  මණ්ඩලයෙන් මූල්‍යමය වශයෙන් උපකාර කළ නොහැකියි. නමුත් තාක්ෂණික සහය දිය හැකියි.