(පියදාස සමරවීර

රුධිර කාන්දුකරණයේ දී භාවිත කරන පෙරණවල හිඟය නිසා පදවිය රෝහලෙන් ප්‍රතිකාර ලබාගන්නා වකුගඩු රෝගීන් විශාල පිරිසක් දැඩි අපහසුතාවකට පත්ව ඇතැයි එම රෝහලේ වෛද්‍ය අධිකාරී පූර්ණිමා විමලරත්න මහත්මිය පැවසුවාය.

පදවිය රෝහලෙන් සතියකට වකුගඩු රෝගීන් 228 දෙනකු පමණ ප්‍රතිකාර ලබා ගන්නා අතර ඔවුන්ගේ රුධිරය මාරු කිරීමට අවශ්‍ය පෙරණ රෝහලේ නැතැයි ද වෛද්‍ය අධිකාරිවරිය කීවාය.

පදවිය, වැලිඔය, වාහල්කඩ සහ ශ්‍රීපුර ආදී ප්‍රදේශවලින් රෝගීන් රුධිර කාන්දුකරණය සඳහා පදවිය රෝහලට දිනපතා පැමිණෙන බව ද වෛද්‍යවරිය කීවාය.

මේ අතර පදවිය රෝහලේ ප්‍රකාශකයකු සඳහන් කළේ මැදවච්චිය, ත්‍රිකුණාමලය සහ වව්නියාව ආදී රෝහල්වලින් පෙරණ ආපසු ලබාදීමේ පදනම මත ලබාගෙන රුධිර කාන්දුකරණය සිදුකරන බවය.

එවැනි පෙරණ 1200ක් වත් පදවිය රෝහලට අවශ්‍ය බව ද ඔහු පැවසීය.

මේ පිළිබඳව උතුරුමැද පළාත් සෞඛ්‍ය අධ්‍යක්ෂ වෛද්‍ය පාලිත බණ්ඩාර මහතාගෙන් කළ විමසුමක දී ඔහු සඳහන් කළේ පෙරණවල හිඟය පිළිබඳව වෛද්‍ය සැපයුම් අංශය දැනුවත් කර ඇති බවය.

පෙරණවල හිඟයක් පවතින බව ද ඔහු කීය.