(යොහාන් භාසුර)

පෞද්ගලික ආරක්ෂක නියෝජිත ආයතන ලියාපදිංචිය කිරීමේ සහ ලියාපදිංචිය අලුත් කිරිමේ ගාස්තු ඉහළ නංවමින් ආරක්ෂක අමාත්‍යවරයා ලෙස ජනාධිපති රනිල් වික්‍රමසිංහ මහතා ගැසට් නිවේදනයක් නිකුත් කර තිබේ.

ඒ අනුව පෞද්ගලික ආරක්ෂක නියෝජිත ආයතනයක් පළමු වරට ලියාපදිංචි කිරීමේ පැවැති රුපියල් 15,000 ගාස්තුව රුපියල් 50,000 ක් දක්වා ඉහළ දමා තිබේ.

පවතින පෞද්ගලික ආරක්ෂක නියෝජිත ආයතනයක ලියාපදිංචිය අලුත් කිරීමේ ගාස්තුව රුපියල් 10,000 සිට 25,000 දක්වා ඉහළ දමා තිබේ.

පෞද්ගලික ආරක්ෂක නියෝජිත ආයතනයක බලපත්‍රය කල්ඉකුත් වී පළමු මාසය තුළ ප්‍රමාද ගාස්තුව රුපියල් 10,000 ක් ද, බලපත්‍රය කල්ඉකුත් වී දින 31 ත් 90 ත් අතර කාලය සඳහා ප්‍රමාද ගාස්තුව රුපියල් 25,000 ක් ද, ලෙස ඉහළ දැමීමට පියවර ගෙන තිබේ.

ලියාපදිංචිය කල්ඉකුත් වී දින 90 කට වැඩි වුවහොත් ප්‍රමාද ගාස්තුව රුපියල් 35,000 ක් බවට පත්කර ඇති අතර මෙම ගාස්තු සංශෝධන පසුගිය පෙබරවාරි මස 20 වැනිදා දින සිට බලපැවැත්වේ.