(අංජුල මහික වීරරත්න)

මෙවර යල කන්නයේ නියඟය නිසා රට පුරා දළ වශයෙන් අක්කර 50000 ක වත් වගා හානි වීම් සිදුවී ඇති බව කෘෂිකර්ම අමාත්‍යාංශ ආරංචි මාර්ග පවසයි.

කුරුණෑගල දිස්ත්‍රික්කයෙන් පමණක් අක්කර 11,000ක වගා හානි වීම් මේ වන විට වාර්තා වී තිබෙන බව කෘෂිකර්ම අමාත්‍ය මහින්ද අමරවීර මහතා පැවසීය.

යල කන්නයේ වැඩිපුරම වගා හානි මේ වාර්තා වන්නේ කුරුණෑගල දිස්ත්‍රික්කයෙනි.

මෙතෙක් කෘෂිකාර්මික හා ගොවිජන රක්ෂණ මණ්ඩලය විසින් වගා හානි සඳහා ගෙවා ඇති වැඩිම මුදල් ප්‍රමාණය මෙවර යල කන්නයේ වගා හානි සඳහා ගෙවීමට රජයට සිදුවනු ඇති බව කී කෘෂිකර්ම අමාත්‍යවරයා එම මුදල් ප්‍රමාණය කෙතෙක් ද යන්න සිතා ගැනීමටවත් නොහැකි වනු ඇතැයි ද සඳහන් කළේය.

ඇතැම් විට රුපියල් බිලියන ගණනින් වගා හානි ගෙවීමට රජයට සිදුවිය හැකි බවද කෘෂිකර්ම අමාත්‍යවරයා සඳහන් කළේය.

පසුගිය වසරේ රජය වගා හානි සඳහා ගෙවා ඇති මුදල රුපියල් මිලියන 1700කි.

උඩවලවේ ජලාශය යටතේ යල කන්නයේ අස්වද්දන ලද කුඹුරුවලින් අක්කර 65,000ක් හානි වීමේ අවදානමට ලක්ව පැවැති අතර සමනල වැවේ ජලය නිකුත් කිරීමෙන් අනතුරුව එම තත්ත්වය යම් තරමකට මගහැරී ගිය බව කෘෂිකර්ම අමාත්‍යංශය පවසයි.

නියඟය නිසා කුරුණෑගල, අනුරාධපුර ,රත්නපුර හම්බන්තොට, මොනරාගල දිස්ත්‍රික්ක වලට වැඩිපුරම වගා හානි සිදුව තිබේ.

මෙම එල්ලිනෝ තත්ත්වය සාමාන්‍යයෙන් කන්න තුනක් සඳහා බලපාන බවට කාලගුණ විද්‍යා අංශය කෘෂිකර්ම දෙපාර්තමේන්තුවට අනතුරු අගවා තිබෙන අතර එසේ වුවහොත් ඉදිරි මහ කන්නයේදී ද වර්ෂාව අඩු වන ඇතැයි පුරෝකථනය කර තිබේ. කෘෂිකර්ම අමාත්‍යාංශය පවසන්නේ දැනට තිබෙන සහල් ප්‍රමාණය ඉදිරි වසරේ මුල් මාස දෙක තුන සඳහා ප්‍රමාණවත් වන නමුත් ඉන් අනතුරුවත් නියඟය පැවතුණහොත් සහල් රටින් ගෙන්වීමට සිදුවිය හැකි බවයි.

(නිකවැරටිය ප්‍රියාණි මංගලිකා)

(කරුවලගස්වැව ජයරත්න වික්‍රමාරච්චි)