(සුජිත් හේවාජුලිගේ සහ  අංජුල මහික වීරරත්න )

ශ්‍රී ලංකා තේ මණ්ඩලය යටතේ   අංක 2245/29 , 2248/36, 2248/37 සහ 2258/14 යන ගැසට් පත්‍රවල පළකළ නියෝග හතරක් සහ සමාගම් පනත යටතේ  අංක 2303/07 දරන ගැසට් පත්‍රයේ පළකළ නියෝගය පාර්ලිමේන්තුවේදී හෙට (21)  විවාදයට ගෙන අනුමත කිරීමට නියමිතය.

මේ අතර පාර්ලිමේන්තුව අද( 21 )  සිට ලබන 24 වැනිදා සිකුරාදා දක්වා රැස්වීමට නියමිත බව පාර්ලිමේන්තුවේ නියෝජ්‍ය මහලේකම් සහ  කාර්ය මණ්ඩල ප්‍රධානී  නීතිඥ කුෂාණී රෝහණදීර මහත්මිය පැවසුවාය.

රජයේ ගෙන එන කල් තබන අවස්ථාවේ යෝජනාව පිළිබඳ විවාදය ඉන් අනතුරුව හෙට  පස්වරු 5.00  සිට පැවැත්වේ.

කොළඹ වරාය නගරය ආර්ථික කොමිෂන් සභාව පනත යටතේ අංක  2299/46  සහ 2299/47 දරන ගැසට් පත්‍රවල සදහන්  නියෝග දෙකක් අනිද්දා (22) දිනයේ විවාද කිරීමෙන් අනතුරුව අනුමත කිරීමට නියමිතය. ඉන්පසු සභාව කල්තබන අවස්ථාවේ ප්‍රශ්න සඳහා  ප.ව 5.00 සිට  5.30 දක්වා කාලය වෙන් කෙරෙනු ඇත.

ආනයන හා අපනයන (පාලන) පනත යටතේ අංක 2309/40, 2311/08 සහ 2311/18 දරන ගැසට් පත්‍රවල පළ කළ රෙගුලාසි තුනක්  මෙන්ම සුරාබදු ආඥා පනත යටතේ අංක 2290/24 ගැසට් පත්‍රයේ පළ කරන ලද නිවේදනයද  (23) බ්‍රහස්පතින්දා පෙ.ව 9.30 සිට ප.ව 5.30 දක්වා විවාදයට ගැනීමෙන් අනතුරුව අනුමත කිරිමට නියමිතය.

ඉන්පසු ශ්‍රී ලංකා ගොඩනැගිලි සේවා ඉන්ජිනේරු සහ තාක්ෂණ ආයතනය (සංස්ථාගත කිරීමේ) පනත් කෙටුම්පත සහ රතනතිස්ස සාම පදනම (සංස්ථාගත කිරීමේ) පනත් කෙටුම්පත යන පෞද්ගලික මන්ත්‍රී පනත් කෙටුම්පත් දෙවනවර කියවීමෙන් අනතුරුව ව්‍යවස්ථාදායක ස්ථාවර කාරක සභාවට යොමු කිරීමට නියමිතව ඇත. අනතුරුව විරුද්ධ පාර්ශ්වය ගෙනෙන සභාව කල්තබන අවස්ථාවේ යෝජනාව පිළිබඳ විවාදය  ප.ව 5.00 සිට ප.ව 5.30 දක්වා පැවැත්වේ.

ඩිල්ශාඩ් රොහාන් තිස්ස අබේගුණසේකර, අබ්දුල් බායිස් කමර්ඩීන්,  ආතවුද සෙනෙවිරත්න සහ  තිස්ස රෙජිනෝල්ඩ් බලල්ලේ යන අභාවප්‍රාප්ත හිටපු මන්ත්‍රීවරුන් මහත්වරුන්  සම්බන්ධයෙන් ශෝක යෝජනා විවාදය ලබන 24 වනදා සිකුරාදා   පෙ.ව 9.30 සිට ප.ව 5.30 දක්වා පැවැත්වෙන බව පාර්ලිමේන්තු මහලේකම් කාර්යාලය පවසයි.