ඉන්දියාවේ නවදිල්ලි අගනුවර රතු බලකොටුව අසල ලාල් ක්විලා මෙට්‍රෝ දුම්රිය ස්ථානයට පිවිසෙන මාර්ගයේ කාර් බෝම්බයක් පුපුරා යෑමෙන් 8 දෙනෙක් ජීවිතක්ෂයට පත්වූහ. තුවාල ලබා රෝහල්ගත කළ ගණන 11 කි.

කාර් බෝම්බය පුපුරා ගියේ ඉන්දියාවේ වේලාවෙන් අද (11) සවස 7.29 ට පමණය. එය ත්‍රස්ත ක්‍රියාවක් විය හැකි යැයි පොලිසිය සැක කරයි.

පිපිරුමත් සමඟ ගින්නක් ද හටගත්තේය. ගින්න නිවා දැමීමට ගිනි නිවන ට්‍රක් රථ 20 ක් අදාළ ස්ථානයට පැමිණි බව ඉන්දීය මාධ්‍ය වාර්තා කළේය. තුවාල ලැබූවන් නුදුරින් පිහිටි ලොක් නායක් ජයප්‍රකාශ් රෝහලට කඩිනමින් ඇතුළත් කෙරුණු බව ද පැවැසෙයි. තුවාල ලැබූවන්ගේ තත්වය බරපතල බවත්, මරණ සංඛයාව තවත් ඉහළ යා හැකි බවත් රෝහල් ආරංචි මාර්ග පැවැසීය.

පිපිරුමෙන් පසු දිල්ලි අගනුවර ආරක්ෂාව තර කිරීමටත් පොලිසිය සීරුවෙන් තැබීමටත් බලධාරීන් උපදෙස් දුන් බව ඉන්දීය මාධ්‍ය වාර්තා වැඩි දුරටත් පැවැසීය.

ඊට අමතරව, පිපිරීමෙන් පසු ඉන්දියාවේ වෙළෙඳ අගනුවර ලෙස සැලකෙන මුම්බායි නුවරත්, ජායිපූර්, උත්තර් ප්‍රදේශ් සහ උත්තරාඛාන්ද් යන ප්‍රාන්තවලත් ආරක්ෂාව තර කිරීමට ආරක්ෂක අංශ පියවර ගත්හ.

රතු බලකොටුව (ලාල් ක්විලා) යනු දිල්ලි අගනුවර ඉදිකර ඇති ඉන්දියාවේ ඉතිහාසය, කලාත්මකභාවය සහ මෝගල් ගෘහ නිර්මාණ ශිල්පයේ විශිෂ්ටත්වය කියාපාන අතිශය වැදගත් ස්මාරකයකි. මෙය 2007 දී යුනෙස්කෝ ලෝක උරුම අඩවියක් ලෙස නම් කරන ලදී.

රතු බලකොටුව අවට වීදි සෑම විටම මෝටර් රථවලින් සහ ජනතාවගෙන් පිරී පවතී. විදෙස් සංචාරකයන් ද රතු බලකොටුව ආශ්‍රිත වීදිවල සැරිසරනු නිරන්තරයෙන් දකින්න ලැබේ.

කාර් බෝම්බය පුපුරා යද්දී ද වීදි ජනාකීර්ණව පැවැතිණි. පිපිරීමත් සමඟ අසල පිහිටි මෝටර් රථවලට, බස් රථවලට සහ ත්‍රී රෝද රථවලට හානි සිදුවිය. ගොඩනැගිලි කීපයකට ද හානි සිදුවිය. පිපිරුමේ ප්‍රබලත්වය කිලෝ මීටර් ගණනාවක් දුරට දැනුණු බව ද ඉන්දීය මාධ්‍ය වාර්තා පෙන්වා දෙයි.

පිපිරුම ගැන සැලසුණු සැණින් ඉන්දීය අග්‍රාමාත්‍ය නරේන්ද්‍ර මෝදි ආරක්ෂක අංශ ප්‍රධානීන්ගෙන් කරුණු විමසා බැලූ බව ද පැවැසෙයි.

නවදිල්ලියේ පිපිරීම සිදුවීමට පැය කීපයකර පෙර, නවදිල්ලි අගනුවර අයත් දිල්ලි ප්‍රාන්තයට යාබද, උතුරු දෙසින් පිහිටි හර්යානා ප්‍රාන්තයේ ෆරීඩාබාද් නුවර කුලී නිවසකින් පුපුරන ද්‍රව්‍ය සහ අවි ආයුධ තොගයක් සොයා ගැනීමට පොලිසියට හැකිවිය. ඒ බුද්ධි අංශ තොරතුරු අනුව යමින් කළ වැටලීමකිනි.

මෙම නිවසේ කුලියට නැවතී සිට ඇත්තේ, ජම්මු කාශ්මීරයේ පුල්වාමා හි පදිංචි වෛද්‍යවරයකු වන මුජම්මිල් ෂකීල් යැයි ආරක්ෂක අංශ තොරතුරු අනාවරණය කරගෙන තිබේ. මොහු පාකිස්තානයට සහාය දක්වන ඉස්ලාමීය ත්‍රස්ත කණ්ඩායමක සාමාජිකතයකු යැයි ද පැවැසෙයි.