(සුජිත් හේවාජුලිගේ සහ නිමන්ති රණසිංහ)

මෝටර් රථ ප්‍රවාහන දෙපාර්තමේන්තුවේ ඇතැම් නිලධාරින් මෙරට විදේශීය රාජතාන්ත්‍රික නිලධාරීන්ගේ අවලංගු කරන ලද  වාහන අංකවලින්  වෙනත් සුඛෝපභෝගී වාහන ලියාපදිංචි කරමින්  කාලයක් තිස්සේ කරගෙන ගොස්  ඇති ජාවාරමක සුලමුල අනාවරණය කර ගැනීමට ජාතික විගණන කාර්යාලය
සමත්වී ඇත.

මෙම වංචාව හේතුවෙන් රජයට රුපියල් කෝටි 15 කට ආසන්න බදු ආදායමක්  අහිමිව ඇතැයි  එම කාර්යාලය පවසයි.

මෙරට විදේශීය රාජ්‍ය තාන්ත්‍රිකයන් රාජ්‍ය අනුග්‍රහය යටතේ තීරුබදු රහිතව නිෂ්කාශනය කර මෝටර් රථ ප්‍රවාහන දෙපාර්තමේන්තුවේ ලියාපදිංචි කරන ලද ඇතැම් වාහනවලට  වෙනත් සුඛෝපභෝගී වාහනවල චැසි අංක සහ එන්ජින් අංක ඇතුළත්  කර වෙනත් පුද්ගලයන්ගේ නමට ලියා පදිංචි සහතික නිකුත් කිරීම මෙම ජාවාරම බව
ජාතික විගණන කාර්යාලය නිකුත් කළ වාර්තාවක සඳහන් වේ.

මේ ආකාරයට පසුගිය වර්ෂවලදී  ලියාපදිංචි කෙරුණු රාජ්‍ය තාන්ත්‍රිකයන් ගේ වාහන හයක් නැවත ප්‍රති ප්‍රති අපනයනය කරන අවස්ථාවන්හිදී ලියාපදිංචිය  අවලංගු කර මෙලෙස සාවද්‍ය ලෙස වෙනත් සුඛෝපභෝගී වාහනවල චැසි අංක සහ එන්ජින් අංක ඇතුළත්  කර වෙනත් පුද්ගලයන්ගේ නම් වලට  ලියාපදිංචි සහතික නිකුත් කර තිබූ බව විගණන විමර්ශනවලදී පෙනී ගොස් ඇත.