(සුජිත් හේවාජුලිගේ සහ  අංජුල මහික වීරරත්න)

ආර්ථික ගැටලු ඇතුළු රටේ ප්‍රශ්න විසඳීම අරමුණු කරගත්  ජාතික සභාවක් පිහිටුවීම සඳහාවූ යෝජනාව පාර්ලිමේන්තුවේ අලුත්ම  න්‍යාය පුස්තකයට ඇතුළත් කරනු ලැබ ඇත.

මෙම  යෝජනාව  පාර්ලිමේන්තුවේිදී  ලබන සතියේ  සම්මත කර කරගැනීමට නියමිතය.

කෙටි කාලීන, මධ්‍ය කාලීන සහ දීර්ඝ කාලීන ජාතික ප්‍රතිපත්ති සම්පාදනය කිරීම සඳහා මඟ පෙන්වීම හා  ආර්ථික ස්ථායිකරණයට අදාල කෙටි සහ මධ්‍යකාලීන පොදු වැඩසටහන් සම්බන්ධයෙන් එකඟතාවක් ඇති කර ගැනීම මෙම ජාතික සභාව පිහිටුවීමේ අරමුණ වේ.

කතානායකවරයා සභාපතිවරයාවූද අග්‍රාමාත්‍යවරයා, පාර්ලිමේන්තුවේ සභානායකවරයා, විරුද්ධ පක්ෂයේ නායකවරයා ආණ්ඩු පක්ෂයේ ප්‍රධාන සංවිධායකවරයා සහ පාර්ලිමේන්තුව නියෝජනය කරන පිළිගත් දේශපාලන පක්ෂවල මන්ත්‍රීවරුන් තිස් පස් දෙනකුට නොවැඩි සංඛ්‍යාවකින් සමන්විතවූ  ජාතික සභාව යනුවෙන් හඳුන්වනු ලබන පාර්ලිමේන්තු කාරක සභාවක් තිබිය යුතු යැයි න්‍යාය පුස්තකයට ඇතුළත් කෙරුණු එම යෝජනාවේ සඳහන් වේ.

ආංශික අධීක්ෂණ කාරක සභා, රජයේ මුදල් පිළිබඳ පාර්ලිමේන්තු  කාරක සභාව, රජය ගිණුම් පිළිබඳ පාර්ලිමේන්තු කාරක සභාව,පොදු ව්‍යාපාර පිළිබඳ පාර්ලිමේන්තු කාරක සභාව, බැංකු කටයුතු සහ මූල්‍ය සේවා පිළිබඳ කාරක සභාව, ක්‍රම සහ විධි පිළිබඳ කාරක සභාව, ආර්ථික ස්ථායිකරණය පිළිබඳ කාරක සභාව සහ රජයේ මුදල් පාලනය කරන කවර හෝ කාරක සභාවක් වෙතින් වාර්තා කැඳවීම ජාතික සභාවට බලය තිබිය යුත්තේය යනුවෙන්ද එම  යෝජනාවේ දැක්වේ.

ජාතික සභාවේ ඝනපූර්ණය සාමාජික මන්ත්‍රීවරුන් දහ දෙනකුගෙන් සංයුක්ත විය  යුතු බවත් කාරක සභාවේ පූර්ණ අවසරය ලබා නොගෙන එහි  අනුගාමී රැස්වීම් තුනකට  නොපැමිණෙන යම් සාමාජික මන්ත්‍රීවරයකු එම කාරක සභාවේ සාමාජිකත්වය අතහැර ගියා සේ සලකනු ලැබිය යුතු බවත් යෝජනාවේ සඳහන් වේ.

ජාතික සභාවක් පිහිටුවීම සඳහාවූ යෝජනාව පාර්ලිමේන්තුවට ඉදිරිපත් කර සම්මත කර ගැනීමට අගමැති දිනේෂ් ගුණවර්ධන මහතාගේ ප්‍රධානත්වයෙන් පාර්ලිමේන්තු සංකීර්ණයේදී  පසුගියදා  රැස්වූ පක්ෂ නායකයෝ තීරණය කළහ.