(යොහාන් භාසුර)

සෞඛ්‍ය සේවාවට අදාළ ගැටළු ජනමාධ්‍යයට ප්‍රකාශ කිරීම තහනම් කරමින් සෞඛ්‍යය ලේකම්වරයා නිකුත් කළ චක්‍රලේඛයට එරෙහිව සෞඛ්‍යය වෘත්තිය සමිති හෙට (3) දිනයේ ක්‍රියාත්මක කිරීමට නියමිතව තිබූ වැඩවර්ධනය තාවකාලිකව අත්හිටවූ බව සෞඛ්‍යය වෘත්තීයවේදීන්ගේ විද්වත් සංගමේ සභාපති රවි කුමුදේශ් මහතා මීට සුළු මොහොතකට පෙර පැවසීය.

 වැඩ වර්ජනය පිළිබඳව සාකච්ඡා කිරීමට සෞඛ්‍ය ලේකම්වරයා අද දින කැඳවූ විශේෂ සාකච්ඡාවෙන් පසුව මෙම තීරණයට එළඹි බව ද කුමුදේශ් මහතා වැඩිදුරටත් සඳහන් කළේය. 

ආයතන සංග්‍රහයේ විධිවිධාන යටතේ සහ වෘත්තිය සමිති ආඥා පනත පනතට අදාලව වෘත්තිය සමිති නායකයන් සඳහා ඇති අනුග්‍රහයක් සෞඛ්‍ය ලේකම්වරයා නිකුත් කළ චක්‍රලේඛයෙහි සඟවා ඇති බව වෘත්තිය සමිති පාර්ශ්වයෙන් යොමු කළ බවත් ආයතන සංග්‍රහයට අනුකූලව සහ වෘත්තීය සමිති නායකයන් සහ වෘත්තීයවේදී ආයතනවල ආයතනවල ප්‍රධානීන්ට ඇති අයිතිය උල්ලංගනය නොවන ආකාරයට එම චක්‍රලේඛය නිකුත් කර ඇති මෙන්ම ඒ අයිතිය වෘත්තිය සමිතිවලට තවදුරටත් තිබෙන බවත් සෞඛ්‍ය ලේකම්වරයා එහිදී ප්‍රකාශ කළ බවද රවි කුමුදේශ් මහතා කීය.

එසේම වෘත්තිය සමිති මර්දනය කිරීම සඳහා තමන් කිසිසේත්ම කටයුතු නොකරන බවත් සෞඛ්‍ය සේවාවේ යහපැවැත්ම වෙනුවෙන් අදහස් දැක්වීමේ දී  සැලකිලිමත් වෙන ලෙස පමණක් සෞඛ්‍ය ලේකම්වරයා එහිදී ඉල්ලා සිටි බවද කී කුමුදේශ් මහතා මේ පිළිබඳව වෘත්තිය සමිති සහ සෞඛ්‍යය ලේකම්වරයා අතර ලිඛිත එකඟතාවයකට පැමිණීම හේතුවෙන් හෙට දවසේ ක්‍රියාත්මක කිරීමට නියමිත වැඩ වර්ජනය තාවකාලිකව අත්හිටවීමට  වෘත්තීය සමිති කමිටුව තීරණය කළ බවද සඳහන් කළේය.

සෞඛ්‍ය සේවාවේ යහපැවැත්ම වෙනුවෙන් සහ රෝගීන්ගේ අයිතිය සුරැකීමට අමතරව වෙනත් ඉලක්කයක් සෞඛ්‍ය වෘත්තිකයන් තුළ නොමැති බව වෘත්තිය සමිති එහිදී අවධාරණය කළ බව ද රවි කුමුදේශ් මහතා වැඩිදුරටත් පැවසීය.