(සිරංගිකා ලොකුකරවිට)

ගාල්ලේ හපුගල කඩකාමරයක අද (08) උදෑසන ගින්නක් ඇති වූ බව පෝද්දල පොලිසිය කියයි.

මෙලෙස ගිනිගෙන ඇත්තේ අද සුබ මොහොතින් විවෘත කිරීමට නියමිතව තිබූ පාවහන් අළෙවි සළකි.

ගින්නට හේතුව මෙතෙක් නිශ්චිතව අනාවරණය වී නැතත් අයිතිකරුවන් පවසන්නේ විදුලි කාන්දුවක් හේතුවෙන් ගින්න හටගන්නට ඇතැයි සැකකරන බවයි.

ගින්නෙන් කිසිවකුටත් අනතුරු සිදුව නොමැති නමුත් පාවහන් ආළෙවි සැළට දැඩි අලාභහානි සිදුව ඇත.

කඩකාමරයට ඉහළින් නිවසක් පිහිටා ඇති අතර එම නිවසට ද ගින්නෙන් අලාභ සිදුව ඇත. ප්‍රදේශවාසීන් එක්ව ගින්න නිවා දැමීමට උත්සාහ කළ අතර පසුව ගිනි නිවන හමුදා රථය පැමිණ ගින්න සම්පූර්ණයෙන් නිවා දැමීමට කටයුතු කළේය.