(ඩයනා උදයංගනී)

කොවිඞ් 19 වසංගත තත්ත්වය හේතුවෙන් නවතා තිබූ පෙර පාසල් වාර්ෂික විවිධ ප්‍රසංග පැවැත්වීමට සෞඛ්‍ය අමාත්‍යාංශය හා අධ්‍යාපන අමාත්‍යාංශය මගින් අවසර දී ඇතැයි කාන්තා හා ළමා සංවර්ධන පෙර පාසල් හා ප්‍රාථමික අධ්‍යාපන, පාසල් යටිතල පහසුකම් හා අධ්‍යාපන සේවා රාජ්‍ය අමාත්‍ය පියල් නිශාන්ත මහතා පැවසීය.

ඒ අනුව සෞඛ්‍ය උපදෙස් අනුගමනය කරමින් වර්ෂ අවසාන විවිධ ප්‍රසංග පැවැත්වීමේ අවස්ථාව පෙරපාසල්වලට හිමිවන බව ද රාජ්‍ය අමාත්‍යවරයා සඳහන් කළේය.

පූර්ව ළමා විය දරුවන්ගේ කුසලතා, ආත්ම ශක්තිම, ආකල්ප හා ක්‍රියාකාරීත්වය වර්ධනය කිරීමට වර්ෂ අවසාන විවිධ ප්‍රසංග වැදගත් බව කී පියල් නිශාන්ත මහතා අධ්‍යාපන ඇමති මහාචාර්ය ජී.එල් පීරිස් මහතා සහ සෞඛ්‍ය අමාත්‍ය පවිත්‍රා වන්නිආරච්චි මහත්මිය සමඟ සාකච්ඡා කර මෙම තීරණය ගත් බව ද කීවේය.

විවිධ ප්‍රසංග පැවැත්වීමට අවසර ලබාදෙන ලෙස පෙර පාසල් ගුරු සංගම් ඉල්ලීම් කර තිබූ බව ද රාජ්‍ය අමාත්‍යවරයා පැවසීය.
රාජ්‍ය අමාත්‍ය පියල් නිශාන්ත මහතා මේ බව පැවසුවේ බත්තරමුල්ල, සෙත්සිරිපායේ පිහිටි එම අමාත්‍යාංශ ශ්‍රවණාගාරයේදී අද (30) පැවති මාධ්‍ය හමුවක් අමතමිනි.