(ලක්මි කුඩලිගම,ප්‍රේමතිලක පෙරමුණ සහ ජේ.ඉඳුරුවගේ)

කළු ගංගාවේ කුඩා ගඟ ද්‍රෝනියේ ඉහල ප්‍රදේශවලට ලැබී ඇති සහ තවමත් ලැබෙමින් පවතින පවතින සැලකිය යුතු ඉහල මට්ටමේ වර්ෂාපතනය හේතුවෙන්බුලත්සිංහල,මදුරාවල සහ පාලින්දනුවර ප්‍රාදේශීය ලේකම් කොට්ටාසවලට  ඉදිරි පැය 24 ක් දක්වා කාලය තුළ එම ද්‍රෝනිය ආශ්‍රිත සුලු ගංවතුර තත්වයක් ඇති විය හැකි බව වාරිමාර්ග දෙපාර්තමේන්තුව නිවේදනය කරයි.

කුඩා ගඟ තැන්න හා පහත් බිම් මෙන්ම ඒ ආශ්‍රිත අතුරු මාර්ග ගංවතුරෙන් යටවීමේ දැඩි අවදානමක් පවතින හෙයින් ඒ ආශ්‍රිත ජීවත්වන ජනතාව සහ මේ ප්‍රදේශ හරහා ගමන් කරන වාහන රියදුරන් මේ ගැන දැඩි සැලකිල්ලක් දක්වන මෙන් වාරිමාර්ග දෙපාර්තමේන්තුව අවධාරණය කරයි.

කුකුලේ ජලාශයේ වාන් දොරටු විවෘත කිරීම නිසා  කුඩා ගං දෝනියේ ජල මට්ටම සෙමෙන් ඉහල යමින් පවතින අතර බුලත්සිංහල මෝල්කාව මාර්ගයේ දඹල, නාලියද්ද යන ප්‍රදේශ මේ වන විට ජලයෙන් යට වෙමින් පවතින නිසා කුඩා වාහන ගමනාගමනයට බාධාපැමිණ ඇත. එසේම ඉහල වෙල්ගම ප්‍රවේශ මාර්ගයද ජලයෙන් යටවී ඇත.

වර්ෂාව ලැබීමේ වැඩිවීමක් සිදුවුවහොත් ජල මට්ටම ඉහළ යාම සිදුවිය හැකි නිසා පහත්බිම වල වාසය කරන්නන් අවධානයෙන් පසුවන මෙන් බුලත්සිංහල ප්‍රාදේශීය ලේකම් කාර්යාලය බල ප්‍රදේශයේ ජනතාවගෙන් ඉල්ලා සිටි.