(නිමන්ති රණසිංහ)

ශ්‍රී ලංකා රජයට අයත් ඇමරිකානු ඩොලර් මිලියන 65 ක මුදලක් සාවද්‍ය පරිහරණය කළැයි කියන සිද්ධියක් සම්බන්ධයෙන් හිටපු මහ බැංකු අධිපති අජිත් නිවාඩ් කබ්රාල් මහතාට එරෙහි නඩුවේ සංශෝධිත පැමිණිල්ලක් ඉදිරිපත් කිරීම සඳහා ලබන මස නොවැම්බර් මාස (11) වැනිදා තෙක් එම නඩුව කල් තැබීමට කොළඹ කොටුව මහේස්ත්‍රාත් තිලිණ ගමගේ මහතා අද (23) නියෝග කළේය.

හිටපු මහ බැංකු අධිපති අජිත් නිවාඩ් කබ්රාල් මහතා මෙම සිද්ධිය සම්බන්ධයෙන් ඇප මත සිටිමින් අද (23) අධිකරණයේ පෙනී සිටියේය.

හිටපු මහ බැංකු අධිපති අජිත් නිවාඩ් කබ්රාල් මහතා වෙනුවෙන් අධිකරණයේ පෙනී සිටි ජනාධිපති නීතිඥ සම්පත් මෙන්ඩිස් මහතා සඳහන් කර සිටියේ මෙම සිද්ධියට අදාළව මූලික විරෝධතා ගොනු කිරීමට බලාපොරොත්තු වන බැවය.

මෙම සිද්ධියට අදාළව පැමිණිල්ලක් ඉදිරිපත් කර තිබෙනේ නුගේගොඩ නාලන්දාරාමාධිපති තීනියාවල පාලිත හිමියන් ය.

ශ්‍රී ලංකාවේ ප්‍රතිරූපය ගොඩ නැංවීමේ අරමුණ ට මුවා වී එවකට ශ්‍රී ලංකා මහ බැංකුවේ අධිපතිවරයා ව කරමින් 2014 වර්ෂයේ දී ශ්‍රී ලංකා මහ බැංකුවට අයත් ඇමරිකානු ඩොලර් මිලියන 6.5 ක මුදලක් ඇමරිකානු සී අයි ඒ ඔත්තු සේවයේ නියුතුව සිටි අහම්ඩ් ස්බ්‍රිරි යන අයට ගෙවා ඇති බව පැමිණිලිකරු සිය පැමිණිල්ලෙන් ඉදිරිපත් කර ඇත .