(ඩී.ජී.සුගතපාල, ජී.ඩබ්ලිව්.කේ.ප්‍රේමතිලක ද සිල්වා,රම්‍යා බිංදුහේවා සහ සුමතිපාල දීයගහගේ)

කොග්ගල පාලම අසල මුහුදේ නාමින් සිටියදි අද සවස රල පහරට හසුව ගසාගෙන ගිය පුද්ගලයන් තිදෙනකුගෙන් දෙදෙනකු බේරාගෙන රෝහල් ගත කළ බවත් එක් අයකු අතරුදහන්ව ඇති බවත් හබරාදුව පොලිසිය පවසයි.

අතුරුදහන්ව ඇත්තේ ඇඹිලිපිටිය ප්‍රදේශයේ පදිංචි කහවල හර්ෂ හේමාල් නමැති 35 හැවිරිදි පුද්ගලයකු බවද පොලිසිය පවසයි.

ඇඹිලිපිටියේ සිට 35දෙනකුගෙන් යුත් කණ්ඩායමක් බස් රථයකින් සංචාරයක් සඳහා පැමිණ සවස හයට පමණ කොග්ගල පාලම අසල මුහුදේ නාමින් සිටියදි මෙසේ රල පහරට ගසාගෙන ගොස් ඇත. පසුව පොලිසිය සහ ප්‍රදේශවාසින් එක්ව දැඩි පරිශ්‍රමයක් දරා බොහෝ වේලාවකට පසු දෙදෙනකු බේරාගෙන ගොඩට ගෙනැවිත් 1990 ගිලන් රථයකින් කරාපිටිය රෝහලට ගෙන ගොස් ඇත.

අතුරුදහන්වු පුද්ගලයා සොයා මේ වනවිට කිමිදුම් කණ්ඩායම් සහ ප්‍රදේශවාසින් එක්ව සෝදිසි මෙහෙයුමක් ක්‍රියාතත්මකකර ඇත.

(ඡායාරූප රම්‍යා බින්දුහේවා)