(සුජිත් හේවාජුලිගේ සහ අංජුල මහික වීරරත්න)

ඕමාන තානාපති කාර්යාලයේ වැඩ තහනමට ලක්වූ නිලධාරියාට එරෙහිව පැමිණිලි පසුගිය වසරේ පෙබරවාරි මාසයේ සිට ලැබී තිබුණද ඔහු සම්බන්ධයෙන් තීරණයක් ගැනීම ප්‍රමාදවී තිබූ බව රජයේ ගිණුම් පිළිබඳ පාර්ලිමේන්තු කාරක සභාවේදී (කෝපා )  තොරතුරු අනාවරණය විය.

මෙම කමිටු රැස්වීමේදී අතිරේක විගණකාධිපති. පී.එල්.කේ පෙරේරා මහතා පැවසූවේ විදේශ සේවා නියුක්ති කාර්යාංශයේ හිටපු සභාපතිවරයා මේ වසරේ පෙබරවාරි මස 28 වෙනි දින එම නිලධාරියා සම්බන්ධයෙන් අභ්‍යන්තර විගණන කාර්යාලය මාර්ගයෙන් පරීක්ෂණයක් කරන ලෙස ඉල්ලා තිබූ බවයි.

එසේම මෙම පුද්ගලයාට එරෙහිව මුදල් වංචා, සහතික වංචා චෝදනා පවා එල්ල වී තිබූ බවද අතිරේක විගණකාධිපතිවරයා පැවසීය.

මේ අනුව මෙම පුද්ගලයා තනතුරේ රැදී සිටියහොත් පරීක්ෂණවලට බාධා විය හැකි බැවින් වහාම මෙරටට ගෙන්වීමට කටයුතු කරන ලෙස විදේශ සේවා නියුක්ති කාර්යාංශයේ හිටපු සභාපති මේජර් ජනරාල් මහින්ද හතුරුසිංහ මහතා ‍මෙම වසරේ පෙබරවාරි මසදී අමාත්‍යාංශයෙන්ද ඉල්ලීමක් කර ඇති බව මෙහිදී තොරතුරු අනාවරණය විය.

විදේශ සේවා නියුක්ති කාර්යාංශයේ අධ්‍යක්ෂ ජනරාල්වරයා මෙහිදී පැවසුවේ විදේශ සේවා නියුක්ති කාර්යාංශයේ හිටපු සභාපතිවරයාගේ ඉල්ලීමට අනුව එම නිලධාරියා සම්බන්ධයෙන් අභ්‍යන්තර විගණන කාර්යාලය හරහා පරීක්ෂණයක් කළද චෝදනා තහවුරු කිරීමට නොහැකි වූ බවයි.

ඕමානයේ මෙරට තානාපතිවරයාගෙන් ලබාගත් වාර්තාව සහ සහ නොවැම්බර් මාසයේ 4 වැනිදා අපරාධ පරීක්ෂණ දෙපාර්තමේන්තුවෙන් ලැබුණු පරීක්ෂණ වාර්තාව මත නිලධාරියාගේ වැඩතහනමකට ලක් කළ බවද අධ්‍යක්ෂ ජනරාල්වරයා මෙහිදී ප්‍රකාශ කළේ‍ය.

මෙම නිලධාරියා සම්බන්ධයෙන් කඩිනමින් පියවර නොගැනීම සම්බන්ධයෙන් කෝපා කමිටුව විදෙස් සේවා නියුක්ති කාර්යාංශයේ නිලධාරින්ට දැඩි අප්‍රසාදය පළ කළේය.

මෙහිදී කම්කරු හා විදේශ රැකියා අමාත්‍යාංශයේ ලේකම්වරයා පැවසුවේ තමා මෙම අමාත්‍යාංශයට පැමිණියේ මෙම වසරේ මැයි මාසයෙන් පසුව වුවද සිද්ධියේ වගකීම බාර ගන්නාබවයි.

මෙහිදී කමිටුව පෙන්වා දුන්නේ ලේකම්වරයා වෙනස් වුවද නිලධාරීන් මෙහි වගකීම දැරිය යුතු බවයි.