(සුජිත් හේවාජුලිගේ සහ නිමන්ති රණසිංහ)

ජාතික ආධුනිකත්ව සහ කාර්මික පුහුණු කිරීමේ අධිකාරිය යටතේ පවතින ඔරුගොඩවත්ත මෝටර් රථ ඉංජිනේරු අභ්‍යාස ආයතනයේ 2020 වර්ෂයේ පූර්ණ කාලීන පාඨමාලාවන් සඳහා ආධුනිකයන් බඳවා ගැනීමේ විවෘත තරග  විභාගය වංචනික අයුරින් කර  සුදුසුකම් සහිත ආධුනිකයන් තිස් දෙනකු සිටිය දී සුදුසුකම් නොලැබූ ආධුනිකයන් විසි  දෙනකු තෝරාගෙන ඇතැයි ජාතික විගණන කාර්යාලය නිකුත් කළ අලුත්ම වාර්තාවක සඳහන් වේ.

මෙම කරුණ විගණනයන් පෙන්වාදී වසර දෙකකට ආසන්න කාලයක් ගතවී තිබුණද අක්‍රමිකතා කළ නිලධාරීන් සම්බන්ධයෙන් පසුගිය වසරේ මාර්තු 15 වැනිදා දක්වාම  කිසිදු විනය ක්‍රියාමාර්ගයක් ගෙන නොතිබූ බව එම වාර්තාවේ දැක්වේ.

මේ අතර කටුබැද්ද කර්මාන්ත ඉංජිනේරු අභ්‍යාස ආයතනයේ ආධුනිකයන් විසින් නිෂ්පාදනය කරනු ලබන ලී බඩු  විකිණීම සඳහා රුපියල්  කෝටියකට ආසන්න මුදලකින් ඉදිකර තිබූ ප්‍රදර්ශනාගාරය සහ ඔරුගොඩවත්ත මෝටර් රථ කාර්මික ඉංජිනේරු අභ්‍යාස ආයතනයේ රුපියල් කෝටියකට ආසන්න මුදලකින්  ඉදිකර තිබූ ශිෂ්‍ය නේවාසිකාගාරය හා කාර්ය මණ්ඩල නේවාසිකාගාරය ඒවායේ උපකරණද  සමග පසුගිය වසරේ මාර්තු මස වනවිටත් භාවිතයට නොගෙන පැවතුණු  බව විගණන කාර්යාලය පවසයි.

තවද පොලොන්නරුවේ  වසා දමා ඇති පුහුණු මධ්‍යස්ථානයක පුහුණු උපකරණ 297 ක් වසර හතකට අධික කාලයක් තිස්සේ ප්‍රයෝජනයට ගෙන නොතිබූ බව  එම වාර්තාවේ වැඩිදුරටත්  සඳහන් වේ.