(විමුක්ති එස් රුද්‍රිගු)

ඉරාන උත්තරීතර නායක අයතුල්ලා අලි කමේනිගේ සමීපතම යුද උපදේශකයා මෙන්ම ඉරාන හමුදාවේ සිටි ජ්‍යෙෂ්ඨතම හමුදා ප්‍රධානියාවූ අලි ෂඩ්මානි ටෙහෙරානයට එල්ල කළ ගුවන් ප්‍රහාරයකින් මරණයට පත්වූ බව ඊශ්‍රායල ආරක්ෂක හමුදාව ප්‍රකාශ කළේය.

ඉරාන ඉස්ලාමීය විප්ලවවාදී ආරක්ෂක බලකායේ මෙන්ම ඉරාන හමුදාවේද අණදෙන නිලධාරියා වූවේද අලි ෂඩ්මානි බව ඊශ්‍රායල ආරක්ෂක හමුදාව පැවැසුවේය.

දින 5 ක් තුළ ඊශ්‍රායල ආරක්ෂා හමුදා විසින් ඉරාන හමුදා ප්‍රධානියා ඝාතනය කර දෙවැනි අවස්ථාවද මෙය වේ.

ඉරානය න්‍යෂ්ටික අවියක් නිපදවීම වැළැක්වීම සඳහා ඊශ්‍රායලය රයිසින් ලයන් මෙහෙයුම ආරම්භ කිරීමෙන් පසුව පස්වැනි දිනටත් ඊශ්‍රායලය ඉරානයටත්, ඉරානය ඊශ්‍රායලයටත් දැඩි මාරාන්තික මිසයිල, ඩ්‍රෝන සහ ගුවන් ප්‍රහාර එල්ල කර ගත්තේය.

පස්වෙනි දිනටත් ඉරානය ඊශ්‍රායලයට මිසයිල ප්‍රහාර එල්ල කර තිබූ අතර ඊශ්‍රායලයේ මොසාඩ් රහස් ඔත්තු සේවා මූලස්ථානයටත්, අමාන් ගබඩා පහසුකම් මධ්‍යස්ථානයටත් මිසයිල ප්‍රහාරයන්ගෙන් හානි සිදුවූ බව ඉරාන බලධාරීහු ප්‍රකාශ කළහ.

එසේම ඉරාන හමුදා ඊශ්‍රායල ගුවන් හමුදාවේ තවත් එෆ්-35 නවීන ප්‍රහාරක ජෙට් යානාවක් ටබ්‍රිස් නගරයේදී බිම දැමූ බවත් එය ඉරාන හමුදා බිම දැමූ ඊශ්‍රායල ආරක්ෂා හමුදාවේ සිවූවැනි එෆ්-35 ප්‍රහාරක ජෙට් යානය බවත් ඉරාන බලධාරීහු සඳහන් කළහ.

ඉරාන හමුදා ඊයේ(17) දිනද මිසයිල සහ ඩ්‍රෝන ප්‍රහාර මාලාවක් එල්ල කළේය. පස්වෙනි දිනය වනවිට ඉරාන ප්‍රහාරවලින් ඊශ්‍රායල වැසියන් 28ක් මියගොස් තවත් 410 ක් තුවාල ලබා ඇති බව ඊශ්‍රායල බලධාරීහු ප්‍රකාශ කළහ. එසේම ඊශ්‍රායල ප්‍රහාරවලින් ඉරාන ජාතිකයන් 229 ක් මියගොස් තවත් 400 කට වැඩි පිරිසක් තුවාල ලබා ඇතැයි ඉරාන බලධාරීහු පැවැසූහ.

තවත් ප්‍රහාරක ජෙට් යානා රැගෙන යන යුද නෞකාවක් මෙන්ම අමතර හමුදා කණ්ඩ මැද පෙරදිග කාලපයට යැවීමට ඇමෙරිකාව ඊයේ(17) තීරණය කළේය. එම තීරණය ගනිමින් ඇමෙරිකා ජනපති ඩොනල්ඩ් ට්‍රම්ප් ප්‍රකාශ කර සිටියේ ඊශ්‍රායල - ඉරාන යුද්ධයට අවශ්‍ය වන්නේ සටන් විරාමයක් නොවන අවසානයක් බවයි.

ඊශ්‍රායලයට ඊයේ(17) ටෙහෙරානයේ සහ ටබ්‍රිස් නගරයේ ස්ථාන කීපයක පිපිරීම් වාර්තා වී තිබිණි. ටෙහෙරානයේ මිලියන 10 ක් පමණ ජනතාවක් වෙසෙන අතර ඉන් බොහෝ පිරිසක් ටෙහෙරානයෙන් ඉවත්විමට උත්සාහ දැරීම හේතුවෙන් දැඩි වාහන තදබදයක්ද නගරයේ වාර්තා වන බව පැවැසෙයි.

මේ වනවිට චීනය ඊශ්‍රායලයේ සිටින සිය වැසියන්ට වහාම ඉවත්වන ලෙස දැනුම්දී ඇති අතර ඇමෙරිකාව ඇවිළෙන ගින්නට පිදුරු දමන ප්‍රතිපත්තියක් අනුගමනය කරන බවටද චෝදනා කර ඇත.