ඇමරිකාවේ විස්කොන්සින් ප්‍රාන්තයේ පසුගියදා පැවති ප්‍රාථමික මැතිවරණයේදී පුද්ගලයන් 7 දෙනකුට කොරෝනා ආසාදනය වී ඇතැයි තහවුරු වී ඇත.

ප්‍රාන්තයේ ප්‍රධාන නගරය වන මිල්වෞකි හි ඡන්දදායකයින් 06 දෙනකු සහ මැතිවරණ රාජකාරියේ යෙදුන නිලධාරියෙකු මෙලෙස ආසාදිතයන් බවට පත්වී ඇත. 

මැතිවරණය පසුගිය අප්‍රේල් 07 වනදා පැවැත්විණ.

ඡන්ද මධ්‍යස්ථාන 200කට අධික සංඛ්‍යවක් තිබුණු  මිල්වෞකි නගරයේ මෙවර එය පහක් දක්වා අඩුකර තිබිණි. 

ඒ හේතුවෙන් ඡන්ද මධ්‍යස්ථාන අසල දිගු පෝලිම් දක්නට ලැබුණු බවත් ඡන්දය ප්‍රකාශ කිරීම සඳහා ජනතාවට බොහෝ වේලා රැඳී සිටීමට සිදුවූ බවත් සෞඛ්‍ය කොමසාරිස් කාර්යාලය තහවුරු කළේය.

මැතිවරණය ආශ්‍රිත ආසාදන සංඛ්‍යාව තවදුරටත් ඉහළ යා හැකි බව ද ඔවුහු වැඩිදුරටත් පවසති.

මේ සම්බන්දව අදහස් දක්වමින්  සෞඛ්‍ය නිලධාරීන් පවසා සිටියේ මහජන සෞඛ්‍ය අර්බුදයක් පවතින අවස්ථාවක ජන්දයක් පැවැත්වීම හේතුවෙන් ජනතාව අවදානමට ලක්ව ඇති බවයි.

මිල්වෞකි නගරයේ මේ වනවිට කොරෝනා ආසාදිතයින් 1 697ක් වාර්තා වී ඇති අතර මරණ 92ක් සිදුවී තිබේ.

විස්කොන්සින් ප්‍රාන්තයේ රෝගීන් 4 620ක් සහ මරණ 242ක් වාර්තා වී ඇත.

කොරෝනා වයිරසය පැතිරයාම හේතුවෙන් මාර්තු 12 වන දින ප්‍රාන්තයේ සෞඛ්‍ය සම්බන්දව හදිසි තත්ත්වයක් ප්‍රකාශයට පත්කරණු ලැබීය. 

අප්‍රේල් 07 දිනය යෙදී තිබුණු මැතිවරණය ප්‍රමාද කිරීමට හෝ තැපැල් ඡන්ද ප්‍රකාශ කරන ක්‍රමයට මැතිවරණය පැවැත්වීමට ඩිමොක්‍රටික් පාක්ෂික ආණ්ඩුකාර ටෝනි එවර්ස් උත්සාහයක යෙදිණි.

එහෙත් රිපබ්ලිකන් පාක්ෂිකයන් පාලනය කරන ප්‍රාන්ත ව්‍යවස්ථාදායකයේ මතයට අධිකරණය පක්ෂ වීම හේතුවෙන් මැතිවරණය පුද්ගලිකව ඡන්දය ප්‍රකාශ කරන ආකාරයටම පැවැත්වීමට සිදුවිය.

ඇමරිකානු ජනාධිපතිවරයා ද තැපැල් මගින් ඡන්දය ප්‍රකාශ කිරීමට විරෝධය පල කර ඇත්තේ එමගින් වංචා සිදුවිය හැකි බව පවසමිනි.

ඇමරිකාවේ තවත් ප්‍රාන්ත කිහිපයකම මැතිවරණ ඉදිරි සතිවල පැවැත්වීමට නියමිතව ඇති අතර ඒවායේ ද මැතිවරණ පවත්වන ආකාරය සම්බන්දව විවිධ අදහස් හා විවේචන පල වෙමින් පවතින බව රොයිටර් පුවත් සේවය වාර්තා කර තිබේ.

මැයි මස මැද භාගයේ මැතිවරණය පැවැත්වීමට නියමිතව ඇති නෙබ්‍රස්කා ප්‍රාන්තයේ ලක්ෂ ගනනක ඡන්ද දායකයින් දැනටමත් තැපැල් ඡන්ද ඉල්ලුම් කර ඇති බව සඳහන් වේ.

(රොයිටර් පුවත් ඇසුරිණි - 085)