(ශ්‍රීනාත් ප්‍රසන්න ජයසූරිය)

කතරගම කඳසුරිදු ගම ප්‍රදේශයේ පිහිටි නිවසක් ඉදිරිපිට රැඳී සිටි පුද්ගලයන් දෙදෙනකු ඉලක්ක කර අද සවස 4.00 පමණ වෙඩි ප්‍රහාරයක් එල්ල කළේ යැයි කියන ඇමති ආරක්ෂක අංශයට අනුයුක්තව රාජකාරි කරන පොලිස් කොස්තාපල්වරයකු වෙඩි තැබීමට යොදා ගත් බව කියන ටී 56 වර්ගයේ ස්වයංක්‍රීය ගිනි අවිය ද සමඟ සැකපිට අත්අඩංගුවට ගත් බව කතරගම පොලිසිය පවසයි.

මෙම ගිනි අවියට අමතරව එම ගිනි අවියේ මැගසින් හතරක් සහ ජීව උණ්ඩ 128 ද සැකකාර පොලිස් කොස්තාපල්වරයා ළඟ තිබී පොලිස් භාරයට ගෙන ඇත.

වෙඩි ප්‍රහාරය එල්ල වනවා සමගම නිවස ඉදිරිපිට රැඳී සිටි පුද්ගලයන් දෙදෙනා පලා ගොස් නූලෙන් දිවි බේරාගෙන ඇතැයි පොලිසිය සදහන් කරයි.

පුද්ගලික අමනාපයක් මත මෙම වෙඩි ප්‍රහාරය එල්ල කර තිබෙන බවට තොරතුරු පොලිසියට ලැබී ඇතැයි කියති.

ඇමති ආරක්ෂක අංශයේ රාජකාරි කරන පොලිස් කොස්තාපල්වරයා ළඟ තිබී  සොයා ගත් ගිනි අවිය මැගසින් හතර සහ ජීව උන්ඩ තොගය ඔහුට රාජකාරි සඳහා නිකුත් කර තිබූ ඒවා බව බවට පොලීසිය සැකකරයි.