(නිමන්ති රණසිංහ)

“රාජ්‍ය රහස්” පනතේ ප්‍රතිපාදන ප්‍රකාරව කොළඹ අධිකරණ සංකීර්ණ පරිශ්‍රය අධිආරක්ෂිත කලාප ලෙසින් නම් කිරීම දැඩි අප්‍රසාදයෙන් යුතුව හෙළා දකින බව කොළඹ ප්‍රධාන මහේස්ත්‍රාත් අධිකරණයේ නිතීඥ සංගමය පවසයි.

ජනාධිපතිවරයා විසින් ප්‍රකාශයට පත්කරනු ලැබූ එම ගැසට් නිවේදනයට අනුව කොළඹ අධිකරණ සංකීර්ණ පරිශ්‍රය අධි ආරක්ෂිත කලාපයක් ලෙසින් නම් කිරීමේ එකී තීරණය කිසිදු කාලීන අවශ්‍යතාවකින් තොරව සිදුරන ලද්දක් බවත් එය නිතියේ අධිපත්‍යය කෙරෙහි අනිසි බලපෑමක් සිදුකරන්නට ඉඩකඩ නිර්මාණය විය හැකි කරුණක් බවත් එම සංගමයේ ලේකම් රසික සංජීව බමුණුහෙන්දර මහතා සදහන් කළේය.

කොළඹ ප්‍රධාන මහේස්ත්‍රාත් අධිකරණයේ නිතීඥ සංගමයේ හදීසි මහ සභා රැස්වීමකදී ගත් තීරණයකට අනුව එම ගැසට් නිවේදනයෙන් එකී තීරණය ඉවත් කිරීම සදහා රජයට බලකරමින් සාමකාමී උද්ඝෝෂණයක් හෙට (27) දහවල් 12.00ට ප්‍රධාන මහේස්ත්‍රාත් අධිකරණය ඉදිරිපිටදී පැවැත්වීමට ද කටයුතු යොදා ඇතැයි ද ලේකම්වරයා පැවසීය.

අදාළ ගැසට් නිවේදනය සංශෝධනය කර අධිකරණ සංකීර්ණය අධිආරක්ෂිත කලාප ලැයිස්තුවෙන් ඉවත් කිරීමට ජනාධිපතිවරයා සහ අධිකරණ ඇමැතිවරයා සමග සාකචඡා කිරිමටත් එම ක්‍රියාමාර්ග තුලින් යහපත් ප්‍රතිචාරයක් නොලදහොත් දැඩි වෘත්තීය ක්‍රියාමාර්ගවලට එළැඹීමටත් ඒකමතිකව තම සංගමය තීරණය කර ඇතැයි ද එම සංගමය පවසයි.