(සිතුම් චතුරංග,ශ්‍රීනාත් ප්‍රසන්න ජයසූරිය සහ ඉන්දිකා රාමනායක)

වවුනියාව , ඊච්චන්කුලම , කල්මඩු සාලම්බන් හීදී පොලිස් විශේෂ කාර්ය බළකා කොස්තාපල්වරයකු අනතුරට පත් කොට පළායාමට උත්සහා කළ කැබ්රථයකට   වෙඩි තබා අත්අඩංගුවට ගත් බව පොලිස් විශේෂ කාර්ය බළකාය පැවසීය.

පොලිස් විශේෂ කාර්ය බළකා නිලධාරීන් නීති විරෝධී දැව ජාවාරමක් වැටලීම සඳහා යමින් සිටියදී සැකකටයුතු කැබ්රථය නතර කරන ලෙස සංඥා කොට ඇති අතර කැබ්රථය විශේෂ කාර්ය බළකා පොලිස් කොස්තාපල්වරයා අනතුරට පත්කොට ධාවනය කොට ඇති බව සඳහන් කළේය.

එලෙස පළායාමට උත්සහ කළ කැබ්රථයට විශේෂ කාර්ය බළකා නිලධාරීන් විසින් වෙඩිතබා නතර කොට ඇති අතර එහි තිබී නීති විරෝධීව කපා ප්‍රවාහනය කරන විශාල ප්‍රමාණයේ බුරුත දැව කඳන් හතක් ද සොයාගත් බවද පැවසීය.

සිද්ධියෙන් තුවාල ලබා ඇත්තේ පරයානකුලම් පොලිස් විශේෂකාර්ය බලකා කඳවුරට අනුයුක්තව සේවය කළ පොලිස් කොස්තාපල් 33529 චන්ද්‍රතිලක නිලධාරියා වේ.

පොලිස් විශේෂ කාර්ය බලකාය පැවසූයේ වෙඩිතබන අවස්ථාවේ කැබ්රථයේ සිටි සැකකරු කැබ්රථ ධාවනය වෙමින් තිබියදී රථයෙන් පැන ගොස් ඇති බවත් රථයේ ඉදිරිපස රෝදයකට හා බඳ ප්‍රදේශට වෙඩි වැදී ඇති බවත්ය.