(ඩයනා උදයංගනී)

රජය මගින් ලබාදුන් අඩු ආදායම්ලාභී නිවාස ව්‍යාපෘතිවල නිවාසලාභීන් 22,308 කට මෙතෙක් හිමිකම් ඔප්පු ලබා දී නැතැයි නාගරික සංවර්ධන හා නිවාස අමාත්‍ය ප්‍රසන්න රණතුංග මහතා පැවසීය.

නාගරික සංවර්ධන හා නිවාස අමාත්‍යාංශය යටතේ ඇති නාගරික සංවර්ධන අධිකාරිය, ජාතික නිවාස සංවර්ධන අධිකාරිය සහ නාගරික ජනාවාස සංවර්ධන අධිකාරිය යන ආයතන මගින් මේ වනවිට අඩු ආදායම්ලාභීන්ට ලබා දී ඇති නිවාස සංඛ්‍යාව 32,933 ක් වන අතර ඉන් හිමිකම් ඔප්පු ලබා දී ඇත්තේ නිවාස හිමියන් 10,625 කට පමණක් බව ද ඇමතිවරයා කීවේය.

එම නිවාසලාභීන්ට ඉදිරි වසරක කාලය තුළ හිමිකම් ඔප්පුලබා දී අවසන් කරන්නැයි බලධාරින්ට උපදෙස් දුන් බව ද ඇමතිවරයා සඳහන් කළේය.

එම ඔප්පු ලබාදීම සම්බන්ධයෙන් පවතින සැප්තැම්බර් මස 31 වනදා වනවිට ආයතන මට්ටමින් විසදා ගැනීමට කටයුතු කරන ලෙසද හා අවශ්‍ය නම් අණ පනත් සංශෝධනය කරන ලෙසද තමන් උපදෙස් දුන් බව ඇමතිවරයා කීවේය.
අමාත්‍යවරයා මේ බව සඳහන් කළේ බත්තරමුල්ල, සෙත්සිරිපායේ පිහිටි නාගරික සංවර්ධන හා නිවාස අමාත්‍යාංශ ශ්‍රවණාගාරයේදී පැවැති සාකච්ඡාවකට එක්වෙමිනි.

නිවාසලාභීන්ට හිමිකම් ඔප්පුව කඩිනමින් ලබා දීම අදාල ආයතනයේ වගකීමක් බව කී ඇමතිවරයා ජනාධිපති රනිල් වික්‍රමසිංහ මහතා පසුගියදා පාර්ලිමේන්තුවට ඉදිරිපත් කළ ප්‍රතිපත්ති ප්‍රකාශය මගින් දතට්ටු නිවාස හිමියන්ට හිමිකම් ඔප්පු ලබා දීම කඩිනම් කරන බව අවධාරණය කර තිබිණි යැයි කීවේය.

හිමිකම් ඔප්පු නොලැබුණු තට්ටු නිවාස හිමියන්ට සහ නිවාසලාභීන්ට හිමිකම් ඔප්පු දීමේදී පවතින ගැටළු නිරාකරණය කිරීම සදහා නිර්දේශ ලබා ගැනීමට ජනාධිපති ලේකම්වරයා විසින් 11 දෙනෙකුගෙන් යුත් කමිටුවක්ද පත්කර ඇතැයි හෙතෙම ප්‍රකාශ කළේය.