ශ්‍රී ලංකාවට පැමිණීම සඳහා නොමිලේ වීසා ලබා දෙන රටවල් තෝරා ගනු ලැබුවේ පසුගිය අවුරුද්දේ ලංකාවට පැමිණි සංචාරකයන් සංඛ්‍යා අනුව, වැඩිම සංචාරකයන් පැමිණි රටවල්වලින් යැයි පැවැති ඇමැති මණ්ඩල තීන්දු ප්‍රකාශ කිරීමේ මාධ්‍ය හමුවේදී (අගෝස්තු 05) ආණ්ඩුවේ මාධ්‍ය ප්‍රකාශක, මාධ්‍ය ඇමැති වෛද්‍ය නලින්ද ජයතිස්ස කීවේය.

ඔහු එසේ කීවේ, එම ලේඛනයට ඊශ්‍රායලය ඇතුළු වූයේ ඒ තේරීම අනුව මිස වෙනත් විශේෂ හේතුවක් නිසා නොවේ යැයි සහතික කිරීමටය. ඊශ්‍රායල සංචාරකයන්ට පොලිස් ආරක්ෂාව ලබාදීම ගැන මාධ්‍යවේදියකු ප්‍රශ්න කළ විට ද ඔහු කියා තිබුණේ, ඔවුන්ට ආරක්ෂාව දෙන්නේ ද මෙරටට පැමිණෙන සියලු‍ විදේශිකයන්ට ආරක්ෂාව ලබා දෙන පොදු තීන්දුව අනුව බව ය.

මේ ප්‍රකාශ මගින් මාලිමා ආණ්ඩුවේ විදේශ ප්‍රතිපත්තිය සහ ඒ අනුව කෙරෙන රාජ්‍යතාන්ත්‍රික ගනුදෙනු පිළිබඳ බරපතළ ගැටලු‍වක් පැන නගී. මෙවැනි විදේශ ප්‍රතිපත්තියකින් ශ්‍රී ලංකාව සම්බන්ධයෙන් ජාත්‍යන්තරව ගොඩනැගෙන ප්‍රතිරූපය, ප්‍රජාතන්ත්‍රවාදී ශිෂ්ට රාජ්‍යයකට ගැළපෙන ප්‍රතිරූපයක් නොවීම ඊට හේතුවය.

මානව හිමිකම් සුරකින, ප්‍රජාතන්ත්‍රවාදය අගයන ශිෂ්ට රාජ්‍ය පාලන, හිරිකිතයකින් තොර ම්ලේච්ඡ ජන සංහාර විවෘතව ක්‍රියාත්මක කරන රටවල් හා ආණ්ඩු සමග ගනු දෙනු කරන්නේ නැත. ගනු දෙනු නොකළ යුතුය. එය 80 දශකය ආරම්භයේ දී ශ්‍රී ලාංකීය ආණ්ඩුව ද ඔප්පු කෙරුවකි. දකුණු අප්‍රිකාවේ සුදු වර්ගවාදී රාජ්‍ය ඉවත් කරමින් නව ආණ්ඩුක්‍රම ව්‍යවස්ථාවක් සමග 1994 දී සියලු‍ ජන වර්ග නියෝජනය වන බහුතරයේ ප්‍රජාතන්ත්‍රවාදී ආණ්ඩු පාලනයක් ස්ථාපිත කෙරෙන තෙක්, දකුණු අප්‍රිකානු සුදු වර්ගවාදී රාජ්‍ය පොදු රාජ්‍ය මණ්ඩලයෙන් හා අනෙක් ජාත්‍යන්තර සබඳතාවලින් පිටමං කර තිබිණ. ශ්‍රී ලංකාව ද ඇතුළුව පොදු රාජ්‍ය මණ්ඩල සාමාජික රටවල් 1977 දී ස්කොට්ලන්තයේ ග්ලෙනීගල්ස්හි අත්සන් කළ සම්මුතිය මගින් දකුණු අප්‍රිකානු සුදු වර්ගවාදී රාජ්‍ය ජාත්‍යන්තර ක්‍රීඩා තරගවලටද නොගත්තේය. ඊට වසර 13 කට පෙර 1964 දී ජාත්‍යන්තර ඔලිම්පික් කමිටුව විසින් දකුණු අප්‍රිකානු සුදු වර්ගවාදී රාජ්‍ය සියලු‍ ඔලිම්පික් තරගවලින් ඉවත් කරනු ලැබීය ඒ වගේම ජාත්‍යන්තර ක්‍රිකට් පාලක කවුන්සිලය ද 1970 දී දකුණු අප්‍රිකානු සුදු වර්ගවාදී රාජ්‍ය සමග ක්‍රිකට් තරග තහනම් කළේය.

මේ මාලිමා ආණ්ඩුවේ මන්ත්‍රීවරුන් කිසිවකු ඇතැම් විට නොදැන සිටිය හැකි, ශ්‍රී ලංකා ක්‍රිකට් පාලක මණ්ඩලය විසින් 1982 ඔක්තෝබරයේ දී ලාංකීය ක්‍රිකට් ක්‍රීඩාවට අදාළව ගනු ලැබූ ඉතා දැඩි තීන්දුවක් ඇත. ශ්‍රී ලංකාවට ජාත්‍යන්තර ටෙස්ට් තරගවලට සහභාගිවීමේ වරම් ලැබී මාස 08 කට පසු එම තීන්දුව ගනු ලැබුවේ වර්ගවාදී දකුණු අප්‍රිකාව සමග ක්‍රීඩා තරග තහනම් කර තිබියදී ශ්‍රී ලාංකික කැරලිකාර ක්‍රිකට් කණ්ඩායමක් තවමත් හරියාකාරව නොකියැවෙන විශාල මුදලකට, වර්ගවාදී දකුණු අප්‍රිකාවේ සංචාරයකට යෑමට එරෙහිව ය. “ඇරෝසා-ඉලවන්” (AROSA - ඇන්තනි රැල්ෆ් ඕපාත ඉංග්‍රීසි මුල‘කුරු සහ South Africa මුල”‍කුරු) යැයි ටෝනි ඕපාත නම් කළ එම කණ්ඩායමේ සංචාරයට සහභාගි වන්නට රෝයි ඩයස්, දුලිප් මෙන්ඩිස් සහ ඩී.එස් ද සිල්වා කොන්ත්‍රාත් අත්සන් කර තිබුණත් ඔවුන් සිම්බාබ්වේ තරගාවලියට සහභාගීව සිටියෙන් ඔවුන්ට දකුණු අප්‍රිකාවට යා නොහැකි විය. දකුණු අප්‍රිකා ගිය 14 දෙනකුගෙන් සමන්විත ක්‍රිකට් කණ්ඩායමේ නායකයා වූයේ බන්දුල වර්ණපුර ය. ඕපාත සමග කණ්ඩායමේ අනෙක් සාමාජිකයන් අතර ජෙරි වවුටර්ස්, මහේෂ් ගුණතිලක, ලලිත් කලු‍පෙරුම, ෆ්ලේවියන් අපොන්සු, බන්දුල ද සිල්වා, අජිත් ද සිල්වා, අනුර රණසිංහ වැන්නෝ ද වූහ.

එකල ශ්‍රී ලංකා ක්‍රිකට් පාලක මණ්ඩලයේ සභාපති වූ මහවැලි ඇමැති ගාමිණී දිසානායකගේ සභාපතිත්වයෙන් එම සංචාරයට සහභාගී වූ ක්‍රිකට් ක්‍රීඩකයන් 14 දෙනාට ජීවිතාන්තය දක්වා ක්‍රිකට් ක්‍රීඩාව තහනම් කෙරිණ. එම තහනම බරපතළ වැඩි යැයි සමාජ මතයක් වූයෙන් පසුව එය වසර 25 කට සීමා කෙරිණ. රණසිංහ ප්‍රේමදාස ජනාධිපති වූ පසු 1991 දී ඒ තහනම ඉවත් කළේය.

වර්ගවාදී දකුණු අප්‍රිකාවට එරෙහි හැම තහංචියකටම එදා ශ්‍රී ලංකාව දායක වූයේ ඔවුන්ගේ සුදු වර්ගවාදය මනුෂ්‍යත්වයට එරෙහි, ප්‍රජාතන්ත්‍ර විරෝධී රාජ්‍යයක් වූයෙනි. අපේ විදේශ ප්‍රතිපත්තියෙහි එය මූලික කොන්දේසියක් වන හෙයිනි. රාජ්‍ය තාන්ත්‍රික ගනු දෙනු තීන්දු කළ යුත්තේ ඒ අනුව වූයෙනි.

ඒ හා සැලකෙන විට, තොග පිටින් පලස්තීනු සිවිල් වැසියන් ඝාතනය කරන, ඔවුන්ගේ වාස භූමියෙන් ඔවුන් පලවා හරින ඊශ්‍රායලය, මේ මාලිමා ආණ්ඩුවේ විදේශ ප්‍රතිත්තියට අනුව මනුෂ්‍යත්වයට එරෙහි, ප්‍රජාතන්ත්‍ර විරෝධී ම්ලේච්ඡ රාජ්‍යයක් නොවන්නේද? ස්පාඤ්ඤය, ස්ලෝවේනියාව, අයර්ලන්තය, ස්වීඩනය වැනි රටවල් ඊශ්‍රායලයට එරෙහි සම්බාධක යෝජනා කරන්නේ, එය ප්‍රජාතන්ත්‍රවාදී ශිෂ්ට රාජ්‍යයක් වන හෙයින්ද? ප්‍රධාන යුරෝපීය නගරවල දහස් ගණන් ජනයා ඊශ්‍රායලයට එරෙහිව පාරට පැමිණ ඇත්තේ ඊශ්‍රායලය සාමකාමී, ප්‍රජාතන්ත්‍රවාදී රටක් වන හෙයින්ද? වත්මන් ඊශ්‍රායල අගමැති බෙන්ජමින් නෙතන්යාහු සහ ඔහුගේ ආරක්ෂක ඇමැතිවරයකු වූ යොආව් ගැලන්ට් යුද අපරාධ හා මනුෂ්‍යත්වයට එරෙහි අපරාධ සම්බන්ධව අත්අඩංගුවට ගැනීම සදහා පසුගිය 2024 නොවැම්බරයේදී හේග් නුවර ජාත්‍යන්තර අපරාධ අධිකරණය විසින් වරෙන්තු නිකුත් කරනු ලැබුවේ, ඔවුන්ට පලස්තීන ජන සංහාරය සම්බන්ධ සෘජු වගකීමක් නොමැති හෙයින්ද?

පසුගිය 2023 ඔක්තෝබරයේ දී ආරම්භ වූ යුද ගැටුම් හේතුවෙන් ඊශ්‍රායල හමුදා ප්‍රහාර හමුවේ ජූලි මස අවසානය වනවිට මිය ගොස් ඇති පලස්තීනු වැසියන් පිරිස 60,000 කට වැඩි යැයි වාර්තා වන්නේ ය. එහෙත් සැබෑ ලෙස මිය ගිය සංඛ්‍යාව ඊට වඩා බොහෝ වැඩි යැයි කියනු ලබන්නේ ඊශ්‍රායලය විසින් විනාශ කරනු ලබන්නා වූ රෝහල්වල, නිවාස සංකීර්ණවල යටවී මිය ගිය සංඛ්‍යාව නිශ්චිතව ගණනය කරගත නොහැකි හෙයින් ය. මිය ගිය සංඛ්‍යාවෙන් සියයට 70 කට වැඩි පිරිසක් කාන්තාවන් හා කුඩා දරුවන් යැයි ගණන් බලා ඇත. මෑතක සිට ඊශ්‍රායලය ආහාර හා හදිසි සහනාධාර බෙදීම ද අඩාල කරමින් ඒවාට ද පහර දෙයි. පලස්තීනයේ ගාසා තීරයෙන් ඔබ්බට ඔවුහු දැන් බටහිර ඉවුර ද ආක්‍රමණය කරති.

එක්සත් ජාතීන්ගේ ලෝක ආහාර වැඩසටහනෙහි හදිසි අවශ්‍යතා අධ්‍යක්ෂ රොස් ස්මිත් ඉකුත් ජූලි 29 වැනිදා ජිනීවාහි දී මාධ්‍යයට ප්‍රකාශ කළේ, “අපගේ රූපවාහිනි තිරයෙහි, අපගේ ඇස් පනාපිට ඉතා පැහැදිලිවම මේ දිග හැරෙන්නේ, මහා විනාශයක්. මෙය අනතුරු ඇඟවීමක් නෙවෙයි. මෙය වහා මැදිහත්වීමකට කෙරෙන කැඳවීමක්. මෙවැන්නක් අපි මේ සියවසෙහි මීට පෙර දැක නැහැ”‍ යැයි කියාය.

එක්සත් ජාතීන්ගේ මහ ලේකම් අන්තෝනියෝ ගුටරෙස් කියා ඇත්තේ, “අපි බියෙන් සිටි දේ දැන් සිදු වෙනවා. පලස්තීනය මහා සාගතයක අබියස ඉන්නේ. සැබෑ තොරතුරු දැන් ලැබෙනවා. ඒවා ප්‍රතික්ෂේප කරන්න බැහැ” යැයි කියාය.

 අපගේ විදේශ ප්‍රතිපත්තියෙහි එවැනි ඊශ්‍රායලයකට ඉඩ තැබිය හැකිද? අනෙක් සාමාන්‍ය රටවලට මෙන් ඊශ්‍රායලයට සැලකිය හැකිද? සැලකිය යුතුද? මාලිමා ආණ්ඩුවේ මාධ්‍ය ප්‍රකාශක වෛද්‍ය නලින්ද ජයතිස්ස කියන ආකාරයට, හැමෝටම එකම රෙද්ද අන්දවන්නට නොහැකිය. විදේශ ප්‍රතිපත්ති තීන්දු කිරීමේ දී හැමෝටම එක සේ සලකනවා යැයි කීම ආණ්ඩුවේ හෙළුව වසා ගන්නට කියන කතාවකි. එහෙත් ඔවුන්ගේ දේශපාලන නිරුවත පෙන්වන්නේ ඔවුන් වෙනුවෙන් මේ තීන්දු ගන්නේ කොළඹ ඇමෙරිකානු තානාපති කාර්යාලයෙහි කියා ය.

අවසන් වශයෙන් මාලිමා ආණ්ඩුවට කියන්නට ඇත්තේ එකම එක කාරණාවකි. මේ සිංහල-බෞද්ධ රටක් යැයි සාඩම්බරයෙන් කියන්නාවූ ජනතාවට ම්ලේච්ඡ ජන ඝාතක රටක් වැදගත් මිතුරකු ලෙස පිළිගත නොහැකිය. කරුණාකර ලාංකීය ගෞරවය, ලෝකය හමුවේ නොකෙළසා, ඊශ්‍රායලය සමග වන සියලු‍ ගනු දෙනු වහා අතහැර දමනු මැනව යැයි කියනු විනා වෙන කුමක් කියන්නද?

(***)