(විමුක්ති එස් රුද්‍රිගු)

ජනපති ට්‍රම්ප් මෙරටට පනවා ඇති සියයට 20 ක තීරු බද්දෙන් යම්කිසි බලපෑමක් කුඩා හා මධ්‍ය පරිමාණ ඇඟලුම් කර්මාන්තකරුවන්ට එල්ල වනු ඇතැයි ශ්‍රී ලංකා ඇඟලුම් අපනයනකරුවන්ගේ සංගමය ප්‍රකාශ කළේය.

සියයට 20ක තීරු බද්ද හේතුවෙන් ඇඟලුම් නිෂ්පාදනවල මිල වැඩිවීමක් බලාපොරොත්තු විය හැකි බවත් තීරු බද්දේ බර දරාගන්නේ කර්මාන්තකරුවන්ද, සැපයුම්දාමයද එසේත් නැතිනම් ඇනවුම්කරුවන්ද යන්න තීරණය කිරීම සඳහා සාකච්ඡා ආරම්භ කිරීමට කාලය එළැඹ ඇති බව පැවැසිය

මූල් අවස්ථාවේදී යෝජනා වූ සියයට 44 ක තීරු බද්ද සියයට 20 දක්වා අඩුකර ගැනීමට රජයගත් උත්සාහය පිළිබඳව සතුටට පත්වන බවද ඇඟලුම් අපනයනකරුවන්ගේ සංගමය ප්‍රකාශ කළේය.

රජය පුද්ගලික අංශයද සහභාගීකරවා ගනිමින් ක්‍රියාකාරීව සාකච්ඡා සිදුකළ බවත් එහි ප්‍රතිඵලයක් ලෙස බංගලදේශය, ඉන්දියාව සහ වියට්නාමය වැනි මෙරට තරඟකාරී රටවල් සමග තරඟකාරීත්වය පවත්වාගෙන යා හැකි සම බිමක් නිර්මාණය වී තිබෙන බවත් ඇඟලුම් අපනයනකරුවන්ගේ සංගමය පැවැසුවේය.

ජනපති ට්‍රම්ප්ගේ තීරු බද්ද සියයට 20 දක්වා අඩුකර ගැනීමට හැකියාව ලැබීම පිළිබඳව ඒකාබද්ධ ඇඟලුම් සංසදයද නිවේදනයක් නිකුත් කළ අතර එහි සඳහන්ව තිබුණේ තීරු බද්ද සියයට 20 ට අඩුකර ගැනීමට හැකියාව ලැබීම පිළිබඳව සතුටට පත්වන බවත් ශ්‍රී ලංකාව තරඟකාරිත්වය පවත්වාගෙන යාමට ඉන් හැකියාව ලැබී තිබෙන බවත්ය.