(අංජුල මහික වීරරත්න සහ තිසර සමල්)

තව පෝය දෙකක් යන විට සජබෙන් බාගයක් ජනාධිපති රනිල් වික්‍රමසිංහ මහතාට සහය පළ කිරීමට එක්වනු ඇතැයි සමගි ජන බලවේගයේ උප සභාපති පී .හැරිසන් මහතා ලංකාදීපයට පැවැසීය.

සජිත් ප්‍රේමදාස මහතා අලි ගිලපු දිවුල් ගෙඩියක් වගේ යැයි ද පිටින් හොඳට පෙනුනාට ඇතුලේ කිසිම දෙයක් නැතැයි ද කී හැරිසන් මහතා ඔහු සමග ඉදිරි ගමනක් නැති බව සඳහන් කළේය.

සමගි ජන බලවේගයේ සියලු තනතුරුවලින් ඉවත් වී තමා ජනාධිපති රනිල් වික්‍රමසිංහ මහතාගේ ගමනට සහයෝගය පළ කරන බව ද හැරිසන් මහතා සඳහන් කළේය.

මම අවුරුදු 13 කට අධික කාලයක් අනුරාධපුර බටහිර ආසන සංවිධායකවරයා හැටියට කටයුතු කරනවා, මැතිවරණ ගණනාවකට ඉදිරිපත් වෙලා තියෙනවා. ඒ මැතිවරණවලදී සමඟි ජන බලවේගයත්, එක්සත් ජාතික පක්ෂයේත් කටයුතු කෙරුවා. මම 1987 ඉඳලා දේශපාලනයයට ඇවිල්ලා, දිවංගත රණසිංහ ප්‍රේමදාස මැතිතුමාගෙන් ආරම්භ කරපු මේ ගමන, මම අද වෙනකන් සජිත් ප්‍රේමදාස මහතාගේ නායකත්වයෙන් අපි වැඩ කෙරුවා, හැබැයි දිගින් දිගටම පක්ෂයේ ගන්නා ක්‍රියාමාර්ගයන් ගැන අපිට සෑහීමකට පත්වෙන්න බෑ. පෞද්ගලිකව අපේ දේශපාලන වැඩවලටත්, ඒ වගේම රට වෙනුවෙන් විපක්ෂ නායකතුමා ගන්නා තීන්දු ගැනත් අපිට සෑහීමකට පත් වෙන්න බෑ.

මේ රට කවදාකවත් නැති විදිහට අර්බුධ රාශියකට මුහුණ දුන්නා.ඒ අර්බුධ හමුවේ අපි එදත් ප්‍රාර්ථනා කෙරුවේ මේ අර්බුධවලට එකම විසඳුම එක්සත් ජාතික පක්ෂයේ ජනාධිපතිවරයෙක්, ඒ වෙනුවෙන් තමයි අපි කටයුතු කෙරුවේ, ගිය සැරේ සජිත් ප්‍රේමදාස මැතිතුමා එක්සත් ජාතික පක්ෂයේ ජනාධිපති අපේක්ෂකයා හැටියට රනිල් වික්‍රමසිංහ මහතාගේ ඉඳලා අපි හැමෝම එතුමාට ඡන්දය දුන්නා.

හැබැයි ඒ අවස්ථාව එතුමාගෙන් ගිලිහිලා ගියා.ඒ කොහොම වෙතත් මහ මැතිවරණය එක්සත් ජාතික පක්ෂය වෙනම තරඟ කරලා, සමඟි ජන බලවේගය වෙනම තරඟ කෙරුවත්, රනිල් වික්‍රමසිංහ මහත්තයාට ආසනයක් නොතිබුණත් ජාතික ලැයිස්තුවේ මන්ත්‍රීවරයෙක් හැටියට එතුමා ඇවිල්ලා රටේ අගමැති වෙලා, රටේ ජනාධිපතිත් වෙලා තියෙනවා.