(මනෝප්‍රිය ගුණසේකර)

ඖෂධ හිඟයක් මවාපාමින් ඉන්දීය ණය යෝජනා ක්‍රමය යටතේ ඖෂධ වර්ග 182ක් ගෙන්වීම සඳහා හිටපු සෞඛ්‍ය අමාත්‍ය කෙහෙළිය රඹුක්වැල්ල මහතා ඉදිරිපත් කළ කැබිනට් පත්‍රිකාවට අනුමැතිය දීම පිළිබඳව ප්‍රකාශ දීම සඳහා රහස් පොලිසියට කැඳවනු ලැබු අමාත්‍යවරු සිව්දෙනාගෙන් තිදෙනෙකු රහස් පොලිසියේ පෙනී සිට ඇති අතර හිටපු ක්‍රීඩා හා යෞවන කටයුතු අමාත්‍ය හරින් ප්‍රනාන්දු මහතා හෙට (22) දින රහස් පොලිසියේ පෙනී සිටින බව දැනුම් දී ඇත.

රහස් පොලිසියේ පෙනී සිටින ලෙස දැනුම් දෙමින් කළ කැඳවීම ලැබෙන විට තමා බදුල්ල ප්‍රදේශයේ සිටීම හේතූවෙන් අද (21) දින රහස් පොලිසියේ පෙනී සිටීම අපහසු හෙයින් 22 වැනිදා පෙරවරුවේ රහස් පොලිසියේ පෙනී සිටීමට අවසර දෙන ලෙස හරින් ප්‍රනාන්දු මහතා රහස් පොලිසියෙන් ඉල්ලීමක් කර ඇති බවද වාර්තාවේ.

හිටපු සෞඛ්‍ය අමාත්‍යවරයා 2022 සැප්තැම්බර් 26 වැනිදා කැබිනට් මණ්ඩලයට ඉදිරිපත් කළ කැබිනට් පත්‍රිකාවේ, රටට අවශ්‍ය ඖෂධ මොනවාද? යන්න පිළිබඳව හෝ සඳහන් කර නොතිබියදී ඇත්ත වශයෙන්ම ඖෂධ හිඟයක් පැවතියේද? යන්න පිළිබඳවව හෝ සොයා බැලීමකින් තොරව කැබිනට් මණ්ඩලය කැබිනට් පත්‍රිකාවට අවසරය දුන්නේ කෙසේද? යන්න පිළිබඳ එම කැබිනට් මණ්ඩලයේ සාමාජිකයින්ගෙන් ප්‍රශ්න කර ප්‍රකාශ සටහන් කරගත යුතු බව කියමින් නියෝජ්‍ය සොලිසිටර් ජනරාල් ලක්මිණි ගිරිහාගම මෙනවිය කළ ඉල්ලීමක් පිළිගනිමින් මාලිගාකන්ද මහේස්ත්‍රාත් ලෝචනි අබේවික්‍රම වීරසිංහ මහත්මිය රහස් පොලිසියට දුන් අවසරයකට අනුව හිටපු අමාත්‍යවරුන් සිව්දෙනා රහස් පොලිසියට කැඳවා ඇත.

බාල බෙහෙත් ජාවාරමට අදාළ සිද්ධිය සම්බන්ධයෙන් ප්‍රශ්න කර ප්‍රකාශ ලබාගැනීම සඳහා මෙලෙස රහස් පොලිසියෙන් කළ කැඳවීමකට අනුව මෙලෙස එහි පෙනී සිටප්‍රකාශ දී ඇත්තේ සෞඛ්‍ය අමාත්‍ය රමේෂ් පතිරණ, නාගරික සංවර්ධන අමාත්‍ය ප්‍රසන්න රණතුංග සහ ක්‍රීඩා සහ යෞවන කටයුතු අමාත්‍ය රොෂාන් රණසිංහ යන මහත්වරුන්ය.

ඉන්දියානු ණය යෝජනා ක්‍රමය යටතේ දුන් ණය මුදල් වලින් ව්‍යාජ ලේඛන සකස් කොට ස්නායු රෝගී්න් සඳහා භාවිතා කරන ‘ඉමියුනෝග්ලෝබින්” සහ පිළිකා රෝගීන් සඳහා භාවිතා කරන ‘රිටොක්සිමැප්’ නමැති ප්‍රමිතියෙන් තොර ප්‍රතිදේහ එන්නත් ආනයනය කර දිවයිනේ රජයේ රෝහල්වලට බෙදා හැරීම මඟින් රුපියල් කෝටි ගණනක වංචාවක් කිරීම සහ රෝගී ජීවීත අනාරක්‍ෂිත තත්වයකට පත් කළැයි කියන සිද්ධියට අදාළව කරන විමර්ශනය අතරතුරදී හිටපු සෞඛ්‍ය අමාත්‍ය කෙහෙළිය රඹුක්වැල්ල මහතා 2022 සැප්තැම්බර් 26 වැනිදා ඉදිරිපත් කළ කැබිනට් පත්‍රිකාව සම්බන්ධයෙන් මෙම විමර්ශනය ආරම්භ කර ඇත.

හිටපු සෞඛ්‍ය අමාත්‍යවරයා 2022 සැප්තැම්බර් 26 වැනිදා කැබිනට් මණ්ඩලයට ඉදිරිපත් කළ කැබිනට් පත්‍රිකාවේ අවශ්‍ය ඖෂධ මොනවාද? යන්න පිළිබඳව හෝ සඳහන් කර නොතිබියදී ඇත්ත වශයෙන්ම ඖෂධ හිඟයක් පැවතියේද? යන්න පිළිබඳව හෝ සොයා බැලීමකින් තොරව කැබිනට් මණ්ඩලය එම කැබිනට් පත්‍රිකාවට අවසරය දුන්නේ කෙසේද? යන්න පිළිබඳ අදාළ කැබිනට් මණ්ඩලයේ සාමාජිකයින්ගෙන් ප්‍රශ්න කර ප්‍රකාශ සටහන් කරගත යුතු බව කියමින් නියෝජ්‍ය සොලිසිටර් ජනරාල් ලක්මිණී ගිරිහාගම මෙනවිය කළ ඉල්ලීමක් පිළිගනිමින් මහේස්ත්‍රාත්වරිය අදාළ කැබිනට් මණ්ඩලයේ සාමාජිකයින් වශයෙන් කටයුතු කළ අමාත්‍යවරුන්ගෙන් ප්‍රශ්න කර ප්‍රකාශ සටහන් කර ගැනීමට දුන් අවසරයකට අනුව අදාළ අමාත්‍යවරුන් මෙලෙස රහස් පොලිසියට කැඳවා ඇත.