කොළඹ කොල්ලුපිටියේ ඇල්ෆ්‍රඩ් ප්ලේස්හි රුපියල් හැත්තෑ කෝටියකට වඩා වටිනා මන්දිරයක්, එහි මුල් අයිතිකාරිය වන ඉන්දියා ජාතික කචා හුසේන්ට බාර දෙන ලෙස කොළඹ කොටුව මහේස්ත්‍රාත් ලංකා ජයරත්න මෙනවිය නියෝග කළාය.

බටහිර බෙංගාලයේ පදිංචි පැමිණිලිකාරිය කියා සිටියේ සහීඩ් සබ්රි නම් තම සැමියා 2014දී මිය ගිය පසු නාලන්ද ෆොන්සේකා නම් කළමනාකරුට එම දේපොළ බලා ගැනීමට බාර දී තමා ඉන්දියාවට ගිය බවයි.

නාලන්ද ෆොන්සේකා ව්‍යාජ ඔප්පුවකින් චන්ද්‍රසිරි නමැත්තකුට එම දේපොළ පවරා අවසානයේ දී කඩුවෙල කොතලාවල ගලඋඩ පාරේ නුවන් රජීවට පවරා ඇති බව උසාවියේදී කියැවිණි.

මේ අතර එම නඩුවේ සැකකරුවන්ට එරෙහිව රහස් පොලිසිය තව නඩුවක් පවරා ඇත. ව්‍යාජ ලේඛන ඉදිරිපත් කර එම දේපොළ අත්කරගත්තැයි ඔවුන්ට එරෙහිව ඇති චෝදනාවයි.

එසේ අත්කරගත් දේපොළ ව්‍යාජ ලියැවිලි මත ලීසිං සමාගමට උකස් තබා ඇතැයි ද රහස් පොලිසිය අධිකරණයට දැන්වීය. එම ඔප්පුවල ඇත්තේ ව්‍යාජ අත්සන් බව ද රහස් පොලිසිය කියා සිටියේ ය.