(යොහාන් භාසුර)

රට තුළ පවතින සහල් හිඟයට කෙටිකාලීන පිළියමක් ලෙස නාඩු සහල් මෙටි්‍රක්ටොන් 70,000 ක් ආනයන කිරීමට තීරණය කළ බවත් රට තුළ මාසකට සහල් මොට්‍රික්ටොන් 40,000 ක අතිරික්තයක් තිබියදී හිඟයක් ඇතිවීම පිළිගත නොහැකි බවත් වෙළෙඳ, වාණිජ, ආහාර සුරක්‍ෂිතතා සහ සමූපකාර සංවර්ධන අමාත්‍ය වසන්ත සමරසිංහ මහතා අද (20) පැවසීය.

නාරාහේන්පිට පිහිටි රජයේ ප්‍රවෘත්ති දෙපාර්තමේන්තුවේදී අද (20) පැවැති විශේෂ මාධ්‍ය හමුවේදී අමාත්‍ය වසන්ත සමරසිංහ මහතා එසේ පැවසීය.

ස්වර්ණ නාඩු සහල් මොට්‍රික්ටොන් 70,000 දෙසැම්බර් මස 15 වැනිදා වන විට කිලෝවක් රුපියල් 220 කට මිලදී ගතහැකි වන පරිදි වෙළෙඳපොළට සැපයීමට නියමිත බවත් මෙම සහල් ප්‍රමාණය දින 15 කට පමණක් ප්‍රමාණවත් වන ලෙස ආනයනය කරන බවත් ඒ මහතා පැවසීය.

ආනයනය කරන සහල් තොගය සතොස, සමූපකාර සහ සුපිරි වෙළෙඳසැල් ජාලය හරහා බෙදාහැරීමට කටයුතු කරන බවත් සහල් ආනයනකරුවන් විශාල පිරිසක් ඒ සඳහා මේ වන විටත් සූදානම්ව සිටින බවත් සමරසිංහ මහතා සඳහන් කළේය.

මෙම සහල් තොගය ආනයනය කිරීමට රුපියල් මිලියන 5,000 ක් හෙවත් රුපියල් කෝටි 500 ක් වැයවනු ඇති බව කී වසන්ත සමරසිංහ මහතා මෙම සහල් ආනයනය ද පැවැති බදු මත ක්‍රියාත්මක වන බව ද සඳහන් කළේය.

මෙරට සහල් පරිභෝජනයෙන් සියයට 65 ක් පමණ නාඩු සහල් වීම නිසා එම සහල් පමණක් ආනයනය කරන බවත් රතු සහ සුදු කැකුළු සහල් පිළිබඳව මේ දක්වා ගැටලුවක් මතුවී නොමැති බවත් අමාත්‍යවරයා කීය.

නාඩු සහල් මොට්‍රික්ටොන් මිලියන 4.8 ක් හෙවත් මෙටි්‍රක්ටොන් ලක්‍ෂ 48 ක් මෙරට තුළ පසුගිය වසර දෙක තුළ නිෂ්පාදනය කර ඇති බවත් මෙරට මාසික සහල් පරිභෝජනය මොට්‍රික්ටොන් 183,000 ක් පමණක් වීම නිසා මොට්‍රික්ටොන් 40,000 ක අතික්තයක් ඇති බවත් වසන්ත සමරසිංහ මහතා කීය.