( එස්. ඩි. කොඩිකාර )

රජය විසින් අද (21)  දින සිට යලිත්  මත්පැන් අලෙවිසැල් නැවත දැනුම්දෙන තුරු  වසා දමන ලෙස නියෝග කර  තිබියදී එම නියෝග නොතකා ඌරුබොක්ක රටබීම හලේ ඉහල මාලයේ වැඩි මිලට සීල් අරක්කු විකුනමින් සිටි සේවකයින් දෙදෙනෙකු සීල් අරක්කු බෝතල් 60 ක්ද සමග අද (21) අත් අඩංගුවට ගත් බව දෙණියාය විශේෂ පොලිස් බලකාය පවසයි. 

මෙසේ අත් අඩංගුවට ගෙන ඇත්තේ එම රටබීම හලේ සේවය කල (33) හැවිරිදි ඌරුබොක්ක ප්‍රදේශයේ  පුද්ගලයෙකු  හා (32) හැවිරිදි බලංගොඩ ප්‍රදේශයේ පුද්ගලයෙකි.

අද (21) සිට මත්පැන් අලෙවිය තහනම් කිරීමේ නියෝගය රජය නිකුත් කිරීමට පෙර අද පෙරවරු කාලයේ  මෙම රට බීම හල පැය භාගයක කාලයක් විවෘත කර තබා ඇති අතර ඒ අවස්ථාවේ මෙම සේවකයින් දෙදෙනා අරක්කු බෝතල් ඉහළ මාලයට ගෙන ගොස් ඇති බව විශේෂ පොලිස් බලකායේ ඉහළ නිලධාරීයෙකු  පැවසීය .

දෙණියාය විශේෂ පොලිස් බලකායට ලැබුණ තොරතුරක් මත මෙම වැටලීම එහි අණදෙන නිළධාරී දුමින්ද හේවා පතිරණ මහතා ඇතුළු කණ්ඩායමක් මගින් සිදුකර ඇති අතර සැකකරුවන් ඉදිරි පරීක්ෂණ  කටයුතු සදහා ඌරුබොක්ක පොලිසියට භාරදී ඇත.