සුපිරි බොලිවුඩ් සල්මාන් ඛාන් ගායන කරන ගීතයක් මේ දිනවල අන්තර්ජාලය තුළ ප්‍රසිද්ධියට පත්ව තිබෙනවා. ඔහු ගයන මෙම Jag Ghoomeya ගීතය ඇතුළත්ව ඇත්තේ ජූලි 06 වැනිදා බොලිවුඩයට සමගාමීව ලොවපුරා ප්‍රදර්ශනය වීමට නියමිතව ඇති අලි අබ්බාස් සෆර්ගේ 'සුල්තාන්' චිත්‍රපටයේය. මේ වනවිට ක්‍රමයෙන් රසික පිරිස් අතර ජනප්‍රියව ඇති සල්මාන් ගයන මෙම ගීතය ඔහු ගායනා කරන තෙවැනි බොලිවුඩ් චිත්‍රපට ගීතය වෙනවා.

ඔහු පළමු වතාවට බොලිවුඩ් චිත්‍රපට ගීතයක් ගායනා කරනු ලැබුවේ 'ජුඩ්වා' චිත්‍රපටයේය. ඒ අනු මලික් සමගය. දෙවැන්න ඔහු විසින් පසුගිය වසරේ නිෂ්පාදනය කළ 'හීරෝ' චිත්‍රපටයේය. 'මේන් තේරා හීරෝ' නම් වූ එම ගීතයට ඉහළ රසික ප්‍රතිචාරද හිමි වුණා. මෙම Jag Ghoomeya ගීතය මුලින්ම ගායනා කරන්නට යෝජනා වී තිබුණේ ජනප්‍රිය චිත්‍රපට පසුබිම් ගායන අර්ජිත් සිංගේ හඬිනි. කෙසේ වෙතත්, ඔහු සල්මාන් සමග සිදුකරගත් අමනාපයක් නිසාවෙන් ඔහුට මෙම ගීතයට සම්බන්ධ වෙන්නට අවස්ථාවක් නොලැබුණි. එහෙත්, පසුව ඔහු සිය %ටිව්ටර්^ ගිණුම හරහා මේ සම්බන්ධය සල්මාන්ගෙන් සමාව අයැද ප්‍රකාශයක්ද නිකුත් කර තිබුණු බවද සඳහන්. නමුත්, සල්මාන් එයට පිළිතුරු ප්‍රකාශයක් ලබා දෙන්නට උත්සාහ නොකළ බවද මෙම තොරතුරු වැඩිදුරටත් සඳහන් කර ති‍බෙනවා.