(විමුක්ති එස් රුද්‍රිගු)

එකලස් කළා යැයි කියන සුජීව සේනසිංහ මහතාට අයත් රුපියල් කෝටි 10 ක් පමණ වටිනා සුඛෝපභෝගී V8 වර්ගයේ මෝටර් රථය අධිකරණ භූමියේ රඳවා තැබීමට පසුකම් හෝ ඉඩ නොමැති බැවින් අධිකරණ භූමියේ නියෝග මත ආරක්ෂාව සහිතව අපරාධ පරීක්ෂණ දෙපාර්තමේන්තුවේ රඳවන ලෙස කොටුව මහේස්ත්‍රාත් තනුජා ලක්මාලි මහත්මිය ඊයේ(12) නියෝග කළාය.

මෝසමක් මාර්ගයෙන් ඊයේ (12) නැවත වතාවක් නඩුව කැඳවූ අතර එහිදී පෙරදින අධිකරණ නියෝග ප්‍රකාරව පෙරේදා (11) සවස 6 ට පමණ සුජීව සේනසිංහ මහතා දැනුවත් කිරීමෙන් පසුව වී8 රථය අපරාධ පරීක්ෂණ දෙපාර්තමේන්තුව භාරයට ගත්බව අපරාධ පරීක්ෂණ දෙපාර්තමේන්තු නිලධාරියා පැවැසුවේය.

රස පරීක්ෂක වාර්තාව තවමත් පැමිණ නැති බවත් මේ වනවිට ප්‍රශ්නගත වාහනය සම්බන්ධයෙන් පාර්ශ්වයන් කීපයකගෙන් ප්‍රකාශ ලබාගෙන තිබෙන බවත් පැමිණිල්ල මෙහෙයවූ නිලධාරියා ප්‍රකාශ කළේය.

නමුත් තවත් ප්‍රකාශ ලබා ගැනීමට තිබෙන බවත් මෙම වාහනය එකලස් කළ එකක් දැයි නිශ්චිතව පැවැසිය හැක්කේ රස පරීක්ෂක වාර්තාව පැමිණි පසුව පමණක් බවත් අපරාධ පරීක්ෂණ දෙපාර්තමේන්තුව පැවැසුවේය. මෙම මෝටර් රථය 2010 වසරේදී පාර්ලිමේන්තු මන්ත්‍රී ශ්‍රී රංගා මහතාට ලැබුණු බලපත්‍රයකට මෙරටට ගෙන්වා ඇති බවත් 2011 වසරේදී මෙම මෝටර් රථය මාරක රිය අනතුරකට මුහුණදී ඇති බවත් පැමිණිල්ල මෙහෙයවූ නිලධාරියා ප්‍රකාශ කළේය.

මාරක රිය අනතුරෙන් පසුව රථය එකලස් කර ඇත්දැයි සෙවීම සඳහා විමර්ශන පැවැත්වෙන බවත් මෝටර් රථය එකලස් කළ එකක් දැයි දැන ගැනීම සඳහා රස පරීක්ෂක වාර්තාව ලැබිය යුතු බවත් අපරාධ පරීක්ෂණ දෙපාර්තමේන්තුව පැවැසුවේය.