( රොමේෂ් මධුෂංඛ )
 
වව්නියාවේ නිරෝධායන මධ්‍යස්ථානයක් පිහිටුවීමට රජය ගත් තීරණය දැඩි ලෙස හෙලා දකින බවට දෙමළ ජාතික සන්ධානයේ මන්ත්‍රීවරුන් පිරිසක් පවසයි.
 
කොරෝනා වයිරස් නිරෝධායන මධ්‍යස්ථානයක් වවුනියාවේ යුද හමුදා කඳවුරක පිහිටුවා එයට සැකකටයුතු පිරිස් රැගෙන ඒමෙන් උතුරේ ජනතාවටද දැඩි අවධානම් තත්වයකට මුහුණ පෑමට සිදුවනු ඇතැයි ඔවුහූ කියති.
 
දෙමළ ජාතික සන්ධානයේ හිටපු පාර්ලිමේන්තු මන්ත්‍රී වරුන් වන සෙල්වම් අඩෙක්කලනාදන් හා චාල්ස් නිරමලනාදන් යන මන්ත්‍රීවරුන් මෙසේ විරෝධය පාති.

එහිදී මන්ත්‍රීවරුන් විසින් කියා සිටින්නේ රජය විසින් නිරෝධයන මධ්‍යස්ථාන ගාල්ල හා හම්බන්තොට වැනි ප්‍රදේශයන්හි ඉතා පහසුවෙන්  පිහිටුවීමට අවස්ථාව තිබියදී උතුරු නැගෙනහිර ප්‍රදේශයන්හි නිරෝධයන මධ්‍යස්ථාන පිහිටුවීම මගින්ම උතුරු නැගෙනහිර ජනතාවගේ තත්වය වැටහී යන බවට පවසා සිටියි.

උතුරු නැගෙනහිර ජනතාව අවධානම් තත්වයකට දමමින් මෙසේ එම ප්‍රදේශයන්හි නිරෝධායන මධ්‍යස්ථාන පිහිටුවීම සිදු නොකළ යුතු බවටත් වයිරස්කාරකය වැළඳී ඇතැයි සැකකෙරෙන පුද්ගලයින් නිරෝධයනය කිරීම සඳහා බහුතරයක් වූ දෙමළ ජනතාව ජීවත් වන ප්‍රදේශ ඉලක්ක නොකොට වෙනත් ප්‍රදේශයන්හි නිරෝධයනය කිරීමට රජය වහාම පියවර ගත යුතු බවටද දෙමළ ජාතික සන්ධානය විසින් වැඩි දුරටත් පවසයි.