(නිමන්ති රණසිංහ)

කුරුණෑගල ශික්ෂණ රෝහලේ ජ්‍යෙෂ්ඨ නේවාසික වෛද්‍ය මොහොමඩ් සාෆි ශිහබ්දීන්  ලබන 25 වැනි දා තෙක් රිමාන්ඩ් කිරීමට කුරුණෑගල මහේස්ත්‍රාත් සම්පත් හේවාවසම් මහතා නියෝග කළේය.
 
රැඳවුම් නියෝග මත රහස් පොලිස් භාරයේ පසුවූ වෛද්‍යවරයාගේ රැඳවුම් නියෝග අත්හිටුවීමෙන් පසු අද අධිකරණයට ඉදිරිපත් කරනු ලැබීය.
 
ඔහු අධිකරණයට ඉදිරිපත් කරමින් රහස් පොලිසිය දැනුම් දුන්නේ ත්‍රස්තවාදය වැලැක්වීමේ පනත යටතේ වෛද්‍යවරයා  රඳවාගෙන තබා ගත්තද එම පනත යටතේ වරදක් සිදු කර ඇතැයි මේ වන තෙක් අනාවරණය වී නැති බවයි.  වඳ භාවයට පත්වී ඇතැයි කියමින් පැමිණිලි කළ මව්වරුන් 143 දෙනකු  එස්එච්ජී පරීක්ෂණයට ලක් කිරීමට අවසර ලබා දෙන්නැයි රහස් පොලිසිය අධිකරණයෙන් ඉල්ලා සිටියේය.
 
වෛද්‍ය සාෆි ශිහබ්දීන් මහතා වෙනුවෙන් පෙනී සිටි නීතීඥවරුන් ප්‍රකාශ කළේ වෛද්‍යවරයාට එරෙහිව ඉදිරිපත් කර ඇතැයි චෝදනා සියල්ලම අසත්‍ය බවයි. පැමිණිලි කළ මව්වරුන් එස්එච්ජී පරීක්ෂණයට යොමු කිරීම ගැන තමන් ද එඟ වන බවත්, මව්වරුන් එම පරීක්ෂණයට ලක් කරන ලෙස ඉල්ලා සිටින බවත් සාෆිගේ නීතීඥවරු ඉල්ලා සිටියහ.
 
මව්වරුන් වෙනුවෙන් පෙනී සිටි නීතීඥවරුන්  ප්‍රකාශ කළේ සාෆිගේ වත්කම් සම්බන්ධයෙන් රහස් පොලිසිය කළ පරීක්ෂණයේ දී ඉඩම්වල මුහුරත් වටිනාකම පමණක් ඉදිරිපත් කර ඇති බවයි. ඒවායේ වර්තමාන වටිනාකම රහස් පොලිසිය ඉදිරිපත් කර නැතැයි ද, බැංකු දෙකක ගිනුම් ගැන පරීක්ෂණයක් නොකර රහස් පොලිසිය සාෆි සම්බන්ධයෙන් ත්‍රස්තවාදය වැලැක්වීමේ පනත යටතේ චෝදනා ඉවත් කර තිබෙන බව ද මව්වරුන් වෙනුවෙන් පෙනී සිටි නීතීඥවරු ප්‍රකාශ කළහ.  එක්තරා බැංකුවට සාෆි නමින් මිලියන 115ක මුදලක් හුවමාරු වී ඇති බව ද එම නීතීඥවරු කීහ. 
 
සියලු පාර්ශ්වයන්ගේ කරුණු සලකා බැලූ මහේස්ත්‍රාත්වරයා වෛද්‍යවරයාට ඇප දෙනවාද නැද්ද යන්න ගැන තීන්දුව පස්වරු 5.30ට ලබා දීමට තීන්දු කළේය. ඒ අනුව 5.30ට පැමිණිල්ල කැඳවූ මහේස්ත්‍රාත්වරයා වෛද්‍යවරයා සම්බන්ධයෙන් ඉදිරිපත් වී ඇති චෝදනාවල බරපතලකම සැලකිල්ලට ගෙන ඔහු  25 වැනි දා තෙක් රිමාන්ඩ් කිරීමට නියෝග කරන බව ප්‍රකාශ කළේය.

(ඡායාරූප - ළහිරු හර්ෂණ)