වාණිජ නියෝජිත ව්‍යාපාරික සංවිධානය සම්බන්ධයෙන් බලපැවැත්වෙන 2002 අංක 8 දරන නීතියේ යම් යම් රෙගුලාසි සංශෝධන කරමින් 2016 අංක 2 දරන නව නීතිය නිකුත් කිරීමට කටාර් හි එමීර් ෂෙයික් ටාමිම් බින් හමාඞ් අල් තානි මහතා කටයුතු යොදා ඇත.

නව නීතියට අනුව යම් භාණ්ඩයක් වෙනුවෙන් දේශීය නියෝජිතයකු සිටියදීත් අවශ්‍ය නම් එම භාණ්ඩය ඍජුවම රටට ආනයනය කිරීමේ අවසරය වාණිජ රෙජිස්ටරයේ ලියාපදිංචිය ලබා ඇති වෙළෙඳුන්ට හිමිවෙයි.

එසේම සම ලෙස සැළකීමේ ප්‍රතිපත්තියේ නීති සහ කොන්දේසි ඇමැතිවරයා විසින් සකස් කරනු ඇත.

සංශෝධිත නීතියේ 18, 19 (1 සහ 2 වගන්ති) සහ 20 වැනි පරිච්ඡේදයේ රෙගුලාසි උල්ලංඝනය කරන අයට මාස 6 ක සිරදඬුවමක් හෝ කටාර් රියාල් 20,000 ක් නොඉක්මවන දඩයක් හෝ ඒ දෙකම නියම කළ හැකිය.

එම උල්ලංඝනය කිරීම නැවත නැවත සිදුකළහොත් දඬුවම දෙගුණයක් (උපරිමය) වන අතර අදාළ වෙළෙන්දාගේ කාර්යාලය වසා දැමීමේ නියෝගයක් නිකුත් කිරීමට උසාවියට බලය ඇත.

නව නීතියට අනුව යම් පුද්ගලයකු තමා නීත්‍යානුකූල වෙළෙඳ නියෝජිතයා බවට කොන්ත්‍රාත් ගිවිසුමක හෝ මුද්‍රිත ලියවිල්ලක් හරහා වැරැදි තොරතුරු ලබා දුනහොත් එවිට මාස තුනකට නොවැඩි සිර දඬුවමක් හෝ කටාර් රියාල් 100,000 කට නොවැඩි දඩයක් හෝ ඒ දෙකම නියම කළ හැකිය.

සංශෝධිත නීතියට අනුව යම් භාණ්ඩයක් සඳහා වරලත් දේශීය බෙදාහරින්නෙකුපත්කර කර ඇති අවස්ථාවක වෙනත් වෙළෙන්දෙක් ඍජුවම එම භාණ්ඩය ආනයනය කරන්නේ නම් එවිට පරිපූරක මූලධර්මවලට අදාළ නීති සහ කොන්දේසි පැනවීමේ බලය ආර්ථික සහ වාණිජ අමාත්‍යවරයාට හිමිවෙයි.