(මනෝප්‍රිය ගුණසේකර)

නේවාසික රෝගියකුට වැඩි මිලට ඖෂධ විකිණීම සම්බන්ධයෙන් කොළඹ ප්‍රධාන පෙළේ පෞද්ගලික රෝහලකට සහ එහි අධක්‍ෂවරුන්ට එරෙහිව පවරා තිබු නඩුව කැඳවීමට දින නියම කර තිබියදී ඊට පෙර දිනයක වැඩබලන මහෙස්ත්‍රාත්වරිය හමුවේ නඩුව කැඳවා පෞද්ගලික රෝහල වෙනුවෙන් පෙනී සිටි නියෝජිතවරයාට දඬුවම් නියම කර ඇත්තේ සියලු නෛතික විධිවිධාන මඟහරිමින් බව අවධාරණය කළ මාලිගාකන්ද මහේස්ත්‍රාත් ලෝචනි අබේවික්‍රම වීරසිංහ මහත්මිය අදාළ පෞද්ගලික රෝහලට සහ එහි අධක්‍ෂවරුන්ට සැප්තැම්බර් 25 වැනිදා අධිකරණයේ පෙනී සිටින ලෙස නියම කරමින් යළිත් වරක් සිතාසි නිකුත් කළාය.

මෙවැනි සිද්ධියකට සාධාරණය පතාගෙන මහජනතාව අධිකරණය හමුවට පැමිණීම ඉතාම දුර්ලභ වුවත් මෙම සිද්ධියේ පැමිණීලිකරු යුක්තිය පතාගෙන අධිකරණය හමුවට පැමිණීම අගය කළ යුතු බව පැවසු මාලිගාකන්ද මහේස්ත්‍රාත්වරිය පොදු මහජනතාවට සහන සැළසීමේ අරමුණීන් යුතුව පනවා ඇති ඹෟෂධ නියාමන අධිකාරී පණතේ අරමුණු හෝ අගතියට පත් පාර්ශවයේ අයිතිවාසිකම් කෙරෙහි කිසිඳු සැළකිල්ලක් නොදක්වා වැඩබලන මහෙස්ත්‍රාත්වරිය ලෙස කටයුතු කළ හිමාලි ඒකනායක මහත්මිය අදාළ දඬුවම් පැමිණවීම කර ඇතැයිද සඳහන් කළාය.

නේවාසික රෝගියකුට වැඩි මිලට ඖෂධ විකිණීම සම්බන්ධයෙන් කොළඹ ප්‍රධාන පෙළේ පෞද්ගලික රෝහලකට සහ එහි අධක්‍ෂවරුන්ට එරෙහිව පවරා තිබු නඩුවේදී මාලිගාකන්ද වැඩබලන මහෙස්ත්‍රාත්වරිය 2024 ජනවාරී 17 වැනිදා දුන් නියෝගය දෝෂ සහගතද? නැද්ද? යන්න පිළිබඳ තීන්දුව ප්‍රකාශයට පත් කරමින් මාලිගාකන්ද මහේස්ත්‍රාත් ලෝචනි අබේවික්‍රම වීරසිංහ මහත්මිය එසේ සඳහන් කළාය.

වැඩබලන මහෙස්ත්‍රාත්වරියගේ නියෝගය දෝෂ සහගත බව තීරණය කිරීමෙන් අනතුරුව මෙලෙස අධිකරණයේ පෙනී සිටින ලෙස නියම කරමින් සිතාසි නිකුත් කරන ලද්දේ නාරාහේන්පිට ප්‍රදේශයේ පවත්වාගෙන යන ප්‍රධාන පෙළේ පෞද්ගලික රෝහලකට සහ එහි අධක්‍ෂවරුන් වන විශාල් බාලී. අශෝක පතිරගේ. අන්තූර් නාන්ද් තදානි. මංජුල කරුණාරත්න. සුදර්ශන් අහංගම. හැරිස් ප්‍රේමරත්න. සිවකුමාර් සෙල්ලයියා. හරේෂ් කුමාර් කයිමාල්. අජිත් කරුණාරත්න සහ අදාළ පෞද්ගලික රෝහලේ සේවිකාවක් වන බී.ඩී. සඳතිසරු නමැත්තන්ටය. නුගේගොඩ හයිලෙවල් පාරේ පදිංචි සනත් කුමාර අතුකෙකා්රල මහතා සෞඛ්‍ය අමාත්‍යංශයට කරන ලද පැමිණීල්ලකින් අනතුරුව ජාතික ඖධෂ නියාමන අධිකාරියේ ආහාර ඖධෂ පරීක්‍ෂකවරයා විසින් කොළඹ ප්‍රධාන පෙළේ පෞද්ගලික රෝහලක අධක්‍ෂවරුන්ට එරෙහිව නඩු පවරා තිබිණී.

2023 පෙබරවාරී 07 වැනිදාත් 19 වැනිදාත් අතර කාලය තුළ නාරාහේන්පිට ප්‍රදේශයේ පිහිටි පෞද්ගලික රෝහලේ නේවාසිකව ප්‍රතිකාර ලබමින් සිටි සමරකෝන් මුදියන්සේලාගේ මන්ත්‍රී කුමාරිහාමි මහත්මියට උපරීම සිල්ලර මිලක් නියම කර ඇති ඖධෂ එම උපරීම සිල්ලර මිලට වඩා වැඩිමිල ගණන් යොදා මුදල් අයකළ බවට ඖධෂ නියාමන අධිකාරි පනත යටතේ විත්තිකරුවන්ට එරෙහිව චෝදනා 11ක් යටතේ ජාතික ඖධෂ නියාමන අධිකාරිය විසින් නඩු පවරා තිබිණී.