ලොව ධනවත්ම යාචකයා ඉන්දියාවේ

(විමුක්ති එස් රුද්‍රිගු)

ලොව ධනවත්ම යාචකයා ඉන්දියාවේ මුම්බායි නගරයේ හිඟා කන අයුරු දැක බලා ගත හැකි බව ඉන්දීය මාධ්‍ය පෙන්වා දී ඇත. යාචකයන් ලෙස කටයුතු කරන්නේ දුගීභාවයෙන් මහත් පීඩාවට පත් ආර්ථික අපහසුතා වලින් යුත් පුද්ගලයන්ය.

නමුත් ඇතැම් පුද්ගලයන් හිඟා කෑම ලාභදායී වෘත්තියක් බවට පත් කර ගෙන ඇතැයි ඉන්දීය මාධ්‍ය පෙන්වා දී තිබේ.ඉකෝනොමික් ටයිම්ස් සඟරාවට අනුව භාරත් ජේන් ලොව ධනවත්ම යාචකයා වේ.ඔහු මුම්බායි නගරය පදනම් කරගනිමින් තම රැකියාවේ නිරත වන බව ඉකොනොමික් ටයිම්ස් සඟරාව පෙන්වා දී තිබේ.

ඔහුගේ දළ වත්කම ඉන්දියානු රුපියල් කෝටි 7.5 ක්(ආසන්න වශයෙන් ශ්‍රී ලංකා රුපියල් කෝටි 28 ක්) වන බවත් මාසික ආදායම ඉන්දීය රුපියල් 60000 ත් 75000 ත් (ආසන්න වශයෙන් ශ්‍රී ලංකා රුපියල් ලක්ෂ 2 ක්) අතර වන බවත්  ඉකොනොමික් ටයිම්ස් සඟරාව සඳහන් කර ඇත.

එසේම භාරත් ජේන්ට ඉන්දියානු රුපියල් කෝටි 1.2 ක් මහල් නිවාසයක් ද , මසකට ඉන්දීය රුපියල් 30000 ක කුලියක් ගෙවනා ව්‍යාපාරික ස්ථාන දෙකක්ද  තිබෙන බව ඉකොනොමික් ටයිම්ස් සඟරාව පෙන්වා දී තිබේ.

ධනවත් පුද්ගලයෙකු වීමෙන් පසුවත් ජේන් හිඟා කෑම නවතා නොමැති බවත් ඔහු දිනකට පැය 10-12 අතර කාලයක් හිඟා කෑමෙන් ඉන්දීය රුපියල් 2000 ත් 2500 ත් අතර ප්‍රමාණයක් උපයන බවත් ඉකොනොමික් ටයිම්ස් සඟරාව සඳහන් කර ඇත.