නාගරික සංවර්ධන අධිකාරියෙන් ව්‍යාපාරිකයකුට හිමිවිය යුතු රුපියල් කෝටි 11ක වන්දියක කොටසක් ලබා ගැනීමේ කටයුතු කරදීම සඳහා රුපියල් ලක්ෂ අනූවක අල්ලසක් ලබා ගත්තේ යැයි කියන හිටපු ප්‍රාදේශීය දේශපාලඥයකු හා ඔහුගේ මිතුරෙකු අල්ලස් කොමිසම මගින් අත්අඩංගුවට ගෙන ඇත.

පිළියන්දල ප්‍රදේශයේ ව්‍යාපාරිකයකු විසින් කරන ලද පැමිණිල්ලක් අනුව අල්ලස් කොමිසම මේ විශේෂ විමර්ශන කණ්ඩායම් දෙකක් විසින් සැකකරු අත්අඩංගුවට ගෙන ඇති අතර අද දින අධිකරණයට ඉදිරිපත් කිරීමට නියමිත බව කොමිසමේ ප්‍රකාශකයෙක් පැවසීය.

පැමිණිලිකරුගේ ඉඩමක් නාගරික සංවර්ධන අධිකාරිය මගින් අත්පත් කර ගැනීමෙන් පසුව පැමිණිලිකරුට රුපියල් කෝටි 11ක වන්දියක් නාගරික සංවර්ධන අධිකාරියෙන් ලබාදීමට නියමිතව තිබී ඇති අතර එම වන්දියෙන් කොටසක් වන රුපියල් කෝටි තුනක මුදලට හිමි චෙක්පත පැමිණිලිකරුට ලබාදීම සඳහා කටයුතු සම්පාදනය කිරීමට සැකකාර හිටපු ප්‍රාදේශීය දේශපාලනඥයා ලක්ෂ අණුවක මුදලක් ඉල්ලා ඇති අතර එම අල්ලස් ලබා ගැනීමේදී සැකකරු අත්අඩංගුවට ගත් බව කොමිසම සඳහන් කළේය.