ලංකාව තවත් ’’කප් එකක්’’ ගහයි

(අංජුල මහික වීරරත්න සහ සුජිත් හේවාජුලිගේ)

ලෝකයේ වැඩිපුරම පිටිකිරි භාවිතා කරන රටවල් පහෙන් එකක් බවට ශ්‍රී ලංකාව පත්ව ඇතැයි පශු සම්පත් සංවර්ධන රාජ්‍ය අමාත්‍ය ඩී.බී. හේරත් මහතා පාර්ලිමේන්තුවේ දී පැවසීය.

දියර කිරි සමග සාපේක්ෂව ගත් කළ පිටිකිරි භාවිතා කිරීම පෝෂණය සම්බන්ධයෙන් යහපත් කාරණයක් නොවේ යැයිද රාජ්‍ය අමාත්‍යවරයා සඳහන් කළේය.

 දියර කිරි භාවිතය ප්‍රචලිත කිරීම අභියෝගයක්ව තිබෙන බවද පශු සම්පත් කාර්යාල 337 ක් ලංකාවේ තිබෙන අතර  "සැබ්" ආයතනයේ සහය ගෙන දියර කිරි අලෙවිය ප්‍රචලිත කිරීම සඳහා නියමු ව්‍යාපෘතියක් ක්‍රියාත්මක කරන බව රාජ්‍ය අමාත්‍යවරයා සඳහන් කළේය.

ලංකාවට අවශ්‍ය කරන කිරි ප්‍රමාණයෙන් මෙරටින්  ලැබෙන්නේ සියයට හතළිහක් පමණක් බවද  සියයට 60ක්ම විදේශ රටවලින් ආනයනය කරන බව කී රාජ්‍ය අමාත්‍යවරයා ලංකාවේ කිරි ගොවීන් සතු දෙනුන්ගේ පෝෂණ අවශ්‍යතාවය වැඩි කිරීමටත් නියමිත වෙලාවට සිංචන කටයුතු කරන්නත් බලාපොරොත්තු වෙන බව පැවසීය.

කුරුණෑගල දිස්ත්‍රික් මන්ත්‍රී උපුල්  මහේන්ද්‍ර රාජපක්ෂ මහතා ඇසූ ප්‍රශ්නයකට පිළිතුරු දෙමින් ඩී .බී හේරත් මහතා මේ බව කීය.