ඉතිහාසය, පුරා විද්‍යාව, බෞද්ධ දර්ශනය හා සංස්කෘතිය පිිළිබඳ පඬිවරයකු වූ මහාචාර්ය මැන්දිස් රෝහණධීර (80) අභාවප‍්‍රාප්ත විය. ඔහු ශ්‍රී ජයවර්ධනපුර විශ්ව විද්‍යාලයයේ ඉතිහාස මහාචාර්යවරයා විය. ඔහු පාලි, සංස්කෘත, සිංහල හා ඉංග‍්‍රිසි මැනැවින් හැසිර විය හැකි උගතෙකි .කවියෙකි. චිත‍්‍රශිල්පියෙකි. අභිලේඛන විශාරදයෙකි. සම්මානනීය ලේඛකයෙකි. පර්යේෂණ ග‍්‍රන්ථ රැසක කර්තෘවරයෙකි. තුන්දරු පියෙකි. මහඇදුරු රෝහණධීර බෙලිඅත්තේ පල්ලත්තරදී 1931.01.21 වැනි දා උපන්නේය. පල්ලත්තර සිංහල මිශ‍්‍ර පාසලෙන් උගෙන 1944 දී පුහුණු ගුරුවරයෙක් විය. මහගම සේකර ඔහුගේ සමකාලිනයෙකි. 1958 ශාස්ත‍්‍රවේ දී උපාධිය දිනා ගත්තේය. 1960 දී පාලි හා සංස්කෘත ඇතුළත් ලන්ඩන් බී.ඒ උපාධිය ද 1960 විදුදය සරසවියේ ශාස්ත‍්‍රවේදී උපාධිය ද හිමිකැර ගත්තේය. වසර 35ක් ශ්‍රී ජයවර්ධන විශ්ව විද්‍යාලයයේ මහාචාර්යවරයකු ලෙස සේවය කෙළේය. මහාචාර්ය රෝහණධීර සිංහල විශ්ව කෝෂය බිහි කිරීමටත් ඉමහත් සේවයක් කෙළේය. 1978 දී ආණ්ඩුක‍්‍රම ව්‍යාවස්ථාව සම්පාදනය කිරීමට ද දායක වූ ඔහු කලක් ශ්‍රී ලංකා නිදහස් පක්ෂයට සම්බන්ධ වී දේශපාලය ද කෙළේය. දේහය බත්තරමුල්ල සුභූතිපුර නිවසේ තැන්පත් කර ඇත. අවසන් කටයුතු බදාදා (31) බොරැල්ල කනත්තේ දී සිදු කිරිමට නියමිතය.