රතුපස්වල රබර් අත්වැසුම් නිෂ්පාදනය කරන වෙනිග්‍රොස් ආයතනය  හා  සම්බන්ධ මේ දක්වා ඇති පැමිණිලි සියල්ල විමර්ශනය කර අවසන් කිරීමට  ලබන විසි දෙවැනිදා  සවස තුනට   ගල්ඔළුව ශ‍්‍රී සම්බුද්ධත්ව ජයන්ති විහාරස්ථානයට එන බව ගම්පහ  සහකාර පොලිස් අදිකාරී චන්දන කොඩිතුවක්කු මහතා විසින් එහි විහාරස්ථානාධිපති  තෙරි පැහැ සිරි ධම්ම හිමියන්ට  අද ලිඛිතව පොරොන්දු විය.

ඔහු එසේ පොරොන්දු වූයේ කම්හලේ සිද්ධියේදී ගැමියන් හා එක්වූ එකම භික්ෂූන් වහන්සේ වන තෙරිපැහැ සිරි ධම්ම හිමියන් පොලිසියේ කැඳවීම මත සිය නීතිඥයන් සමග වැලිවේරිය පොලීසියට ගිය අවස්ථාවේදීය.

 රතුපස්වල ගමෙහි ගැමියන් අතර සමගිය නැති කර ගම දෙකඩ කිරීමට  කම්හලට හිතැති පිරිසක් ක‍්‍රියා කරන බවත් තමන් වහන්සේට සහ තමා වටා රොක්වී සිටින ගැමියන්ට විරුද්ධව ඔවුන්ගෙන්  ලැබී ඇති පැමිණිලි,  ගම් වැසියන් අතර සාමය ආරක්ෂා කරන අයුරින් කඩිනමින් විස‍දන මෙන්   මෙහිදී සිරිධම්ම හිමියෝ පොලිසියෙන් ඉල්ලා සිටියහ.

එසේම  පසුගිය 12 වෙනිදා  තම විහාරස්ථානයට පැමිණි පොලිස් නිලධාරීන්  තමන් වහන්සේට විරුද්ධව ඇති පැමිණිලි විභාග කිරීම සඳහා අද 14  දින  පොලිසියට පැමිණෙන ලෙස දන්වා තිබුන බවත්  නැවත 13 වෙනි දින පොලිසියට පැමිණීම අවශ්‍ය නැතැයි  කියා ලිපියක්  ලැබී  තිබීම ගැටළු සහගත තත්වයක් බවත් මෙහි තේරුම කුමක්දැයි ඒ හිමියෝ  පොලිස් අධිකාරීවරයාගෙන් විමසූහ.

    එහිදී සහකාර පොලිස් අධිකාරී චන්දන කොඩිතුවක්කු මහතා පැවසූවේ  සිරිධම්ම හිමියන් කට උත්තර ලබා දීමට පොලිසිය ඒමට අවශ්‍යතාවයක් නැති බවත්  කට උත්තර ලබා ගැනීම සඳහා පොලිස් නිලධාරීන්ව  විහාරස්ථානයට එවන බවත්ය.

එවිට සිරිධම්ම හිමියන් පැවසූවේ එය තමන් වහන්සේ වෙත ලිඛිත ප‍්‍රකාශයකික් අවශ්‍ය බවයි.

මෙහිදී  තවත් ගම් වැසියෙකු  සහකාර පොලිස් අධිකාරීවරයාගෙන් ඉල්ලා සිටියේ දේශපාලන  පක්ෂයක   ප‍්‍රාදේශීය සභා මන්ත‍්‍රීවරයෙකු  මෙහි ප‍්‍රශ්න ඇති කරන බවත් ඒ පිළිබඳවද සොයා බලා සුදුසු පියවරක් ගන්නා ලෙසයි.

පසුව සියල්ලන්ගේ කැමත්ත අනුව ලබන 22 ඉරිදා සවස තුනට වෙනිග්‍රොස් ආයතනය හා සම්බන්ධව මේ දක්වා පොලීසියට ලැබී ඇති සියළුම  පැමිණිලවල පැමිණිලි කරුවන් හා වග උත්තරකරුවන් අතර පැමිණිලි විමර්ශනය කර අවසන් කිරීමට කටයුතු කරන බැවින් ඒ සම්බන්ධ පැමිණිලි වලට සිරිධම්ම හිමියන් නැවත පොලීසියට පැමිණීම අවශ්‍ය  නොවන බව දන්වා පොලිස් අධිකාරීවරයාගේ අත්සන සහිත ලිපිය ලබා දීමෙන් පසු  සිරි ධම්ම හිමියන්  ඇතුළු ගැමියෝ  පොලීසියෙන් පිටව ගියහ.

 සිරි ධම්ම හිමියන්ට පක්ෂව පැමිණි ගැමියන් රැසක් පොලිස් ස්ථානය වටා රොක්ව සිටි අතර  ඒ හිමියන්ට විරුද්ධව  කිහිප දෙනෙක්ද  එහි වූහ.

පොලිසියට ඇතුළුවන ගේට්ටුව අසලදී සිරිධම්ම හිමියන් මාධ්‍ය අමතද්දී එම දෙපිරිස අතර යම් උනුසුම්කාරී වචන හුවමාරුවක්ද ඇති විය.

එම අවස්ථාවේ   සිරිධම්ම හිමියන් මාධ්‍ය අමතමින් පැවසූවේ.

අපි අතර භේද භින්න ඇති කරලා මේක දියාරු  කරන්න විවිධ කොටස්  යම් යම්  වැඩ සටහන් ක‍්‍රියාත්මක කරනවා.   පහුගිය දවසක  මහා සංඝයා වහන්සේලා ගම්පහ කච්චේරියට එකතු වෙලා මේක දියාරු කරන්න උත්සහ කළා.  උන් වහන්සේලාටත් පුළුවන්කමක්  නැහැ සත්‍ය කියන දේ  වහන්න. කාගේ හරි මුදලකට යටවෙලා හරි කීමකට හරි තමයි එදා ඒ රැස්වීම කැඳවලා තියෙන්න ඇත්තේ.  මේ අය මේ ගිනියන ව්‍යාපාරය මොකක්ද, ඒක මහ නායක හාමුදුරුවරු දැනගන්න  ඕනේ.  මහ ජනතාවගේ  ජීවන අරගලය,  දුක්විඳින ප‍්‍රශ්න තේරෙන්නේ නැද්ද. මේ ජනතාවට ඇතිවෙච්ච  විපත්තිය තේරුම් ගන්න බැරිනම් මොකක්ද මේ චීවරයේ තියෙන ගෞරවය.

ඒත් එක්කම ඊ ලගට දේශපාලන අධිකාරිය විවිද මත ගෙනාවා.  යම් යම් අය මුදල් විසි කළා මේක දියාරු කරන්න.  ඒත් බැරිවුනා.  දැන් වැඩ පිළිවෙල යන්නේ ගමේ මිනිසුන්  කොටවලා තියන්නයි.  අපි ඒවට ඉඩ තියන්නේ නැහැ. සියළු දෙනාම මේ වෙලාවේ බුද්ධිමත් වෙන්න  ඕනා.

මෙතන දේශපාලනයක් නැහැ. මේ ඔක්කොම ගම්වැසියෝ. මෙතන ජනතා විමුක්ති පෙරමුණත් ඉන්නවා, එක්සත් ජාතික පක්ෂයත් ඉන්නවා, ආණ්ඩු පක්ෂයේ අයත් ඉන්නවා. මේ සියළු දෙනා ප‍්‍රජාතන්ත‍්‍රීවාදී රටක ර්‍ලාංකීය පුරවැසියෝ.

ඒ නිසා සියළු දෙනා එකට එකාවන්ව එකම ප‍්‍රශ්ණයක් තුළ ඉන්න ජනතාවක් හැටියට පෙළ ගැහෙන්න කියලා මම පණිවඩයක් දෙනවා.

වැලිවේරිය ප‍්‍රදේශයේ ඉන්න කතෝලික බැතිමතුන් මේ සිද්දියේදී සෘජුවම සහයෝගය ලබා දෙනවා. බෞද්ධ අබෞද්ධ සියළු දෙනාගේ සිට පුංචි දරුවාගේ සිට මහල්ලා දක්වා සහයෝගය ලබා දුන්නා.

මෙතන කිසිම වෙනත් පාර්ශවකරුවන් නැහැ. ජනතාව  ස්වාධීනව  මේ හාමුදුරුවන් සමග එකට එකතුවෙලා ඉන්නේ ප‍්‍රශ්නෙට විසදුම් සොයන්නයි.

අපි හැම දෙනාටම කියන්නේ මේ ප‍්‍රශ්ණයට නිසියාකාර පිළිතුරු ලැබෙන තුරු ඒක දියාරු කරන වැඩ වලට සම්බන්ධ වෙන්න එපා.

අපිට තාම ජල යුද්ධය ඉවර නැහැ. ප‍්‍රධාන පාරවල් වල පමණක් බට ටික එලාගෙන ගිහින් තියෙනවා. කිසිම කෙනෙක් මූලික ගෙවීමක් කරලා වතුර ගන්න සූදානම් නැහැ. 

එක එක ප‍්‍රකාශ අපිට ඇහෙනවා. නමුත් අපි ඒවට බයත් නැහැ. සියළු දෙනාටම වතුර දෙන්න  ඕනා.  කර්මාන්ත ශාලාව මෙතනින් ගිනියන්න   ඕනා.  අහවල් දිනේදිම වෙනවා කියලා ලිඛිතව ප‍්‍රකාශ කරන්න  ඕනා.

අරහෙන් ඉඩම් ගත්තා , මෙහෙන් ඉඩම් ගත්තා, අහවල් දිහාට ගිනියනවා කියන ඒ කතා හරියන්නේ නැහැ.

26 වෙනිදාට මේ සම්බන්ධයෙන් නඩුව තියෙනවා. එදාට නියම තීරණයක් අපිට ලබා දෙන්න.  මහජනතාවට මේ  විදියට හැමදාම රස්තියාදු වෙන්න බැහැ.

කම්හල නැවත ආරම්භ කරන බවට යම් යම් ප‍්‍රකාශ නිකුත් වීම නිසා  කම්හල ඉදිරිපිට පසුගිය 30 වෙනිදා  යලි විරෝධතාවයක් ඇති වුනා.  ඒ අවස්ථාවේදී එහි සිටි සේවකයන්ට යම් යම් ගැටළු මතු  වුනා.  කාගේ හෝ බලපෑම මත ඔවුන් පොලීසියට පැමිණිලි කර තිබෙනවා.

මෙසේ පැමිණිලි කර තිබෙන්නේ  ගමේ මිනිස්සු අතර තියෙන සමගිය නැති කරන්නයි. මේ හේතුව නිසා එකම ගෙදර මිනිස්සු භේද බින්න වෙන තත්වයක් ඇති වී තියෙනවා.

මේ සම්බන්ධයෙන් විභාග කරන්න මට 14 වෙනිදට පොලිසියට එන්න කියලා  කැඳවුම් ලිපියක්  මුලින්ම ලැබුනා.  නැවතත්  ලිපියක්  ලැබිලා තියෙනවා 13 වෙනිදට එන්න එපා කියලා. මේක අවුල් සහගත නිසා තමයි මම අද පොලීසියට ආවේ.

මම ගම්වැසියන්ට කියන්නේ කිසි කෙනෙක් අසමගි වෙන්න එපා.  මහජනතාව දැනගන්න  ඕනා මෙවැනි ප‍්‍රශ්න ඇතිවුනාම සාමකාමීව විසඳාගන්න.