ඇමරිකාව හා එංගලන්තයේ ඇනවුම් වලට යැවීමට සූදානම් කොට තිබූ රුපියල් කෝටි 14 කට ආසන්න කාන්තා යට ඇඳුම් තොගයක් සොරකම් කළැයි කියන දෙදෙනෙකු මීගමුවේ දී අත්අඩංගුවට ගැනීමට නියමිත වුවත් ඇපකරුවන් ඉදිරිපත් කැර ඔවුන් බන්ධනාගාරයේම තව දුරටත් රැඳී සිටීමේ රහසිගත සැලැස්මක් හෙළි වී ඇති බව පොලිසිය කියයි.

සුපිරි සන්නාම යටතේ කාන්තා යට ඇඳුම් තොගයක් අනුරාධපුරය නෙළුබෑවේ කම්හලකින් සොරකම් කැර ත්‍රී රෝද රථයකින් ගෙන ගොස් සුපිරි රෙදිපිළි හල් වලට විකුණූ බව  කියන සොර කණ්ඩායමේ ප්‍රධාන දෙදෙනා, පෙර සීදූව ඇගලුම් සොරකමක් සම්බන්ධයෙන් ඇප ලබා සිටියත් රුපියල් කෝටි 14  වටිනා සොරකම සම්බන්ධයෙන් මීගමුව බන්ධනාගාරයේම සිටින බවත් ඇගලුම් සොරකම සිදු වූ ආයතනයේ කලමණාකරුවෙකු සමග රහස් එකඟතාවයකට පැමිණ ඇති බවත් පොලිසිය කියයි.

ප්‍රධාන සැකකරුගේ අනියම් බිරිඳ යැයි කියන කලකට ඉහත දී අනුරාධපුරයේ පදිංචිව සිටි කාන්තාවක් ද ආඩිඅම්බලම කෝවින්නේ උප ඇගලුම්  කර්මාන්ත ශාලාවක් පවත්වාගෙන යන මුවාවෙන් ලක්ෂ 80 ක් පමණ වටිනා සොර බඩු (යට ඇඳුම්) ලඟ තබා ගැනීමේ වරදට ඉකුත් දා මීගමුව කොච්චිකඩේ වෙන්දේසි වත්තේ දී අත්අඩංගුවට ගෙන අනුරාධපුර මහේස්ත්‍රාත් අධිකරණයට ඉදිරිපත් කිරීමෙන් පසුව 25 දින දක්වා රිමාන්ඩ් බන්ධනාගාර ගත කොට ඇත.