මුහුදු මහා විහාරයේ බවුන් වඩද්දී හිමි නමට හබලෙන් ගහලා

(ශ්‍රීනාත් ප්‍රසන්න ජයසූරිය)

පොතුවිල් මුහුදු මහා විහාරයේ වැඩ වාසය කරන හිමිනමක් ආතිමූණෙයි මදුරන්වේලි ප්‍රදේශයේ පිහිටි ගල් ලෙනක භාවනා යෝගීව වැඩ වාසය කරමින් සිටියදී පුද්ගලයින් හත් දෙනකු එම භාවනා කුටියට කඩා වැදී හිමිනමට හබලකින් පහරදීරුපියල් 50,000ක මුදලක් හා ජංගම දුරකථනය පැහැර ගෙන පලාගොස් ඇතැයි පොතුවිල් පොලිසිය පවසයි.

මෙසේ කඩා වැදුණු පුද්ගලයන් හත් දෙනාගෙන් එක් අයකු විසින් ඔරු පැදීමට යොදා ගන්නා හබලකින් පහරදුන් අවස්ථාවේ භාවනාව යෝගීව වැඩ සිටි භික්ෂූන් වහන්සේ පළාගොස් කොහොඹ ගසක් යට සැඟව සිට ඇතැයි පොලිසිය පවසයි.

පැය කාලකට ආසන්න කාලයක් කොහොඹයක් ගසට මුවාවී සැඟවී සිටි අවස්ථාවේ එම ස්ථානයට පාර්ලිමේන්තු මන්ත්‍රීවරයකු සහ පොතුවිල් ප්‍රාදේශීය සභාවේ හිටපු සසභාපතිවරයකු පැමිණ ඇත.

ඔවුන් දුටු හිමිනම සැඟව සිටි ස්ථානයෙන් එළියට පැමිණ මෙම සිද්ධිය එම දෙදෙනාට දැනුම් දී ඇතැයි පොලිසිය කියයි.

පසුව හිමිනම වැඩ වාසය කරන ගල් ලෙනට ගොස් බැලීමේදී එහි තිබූ රුපියල් 50,000 ක මුදල සහ ජංගම දුරකථනය නොමැති බව දැක ඇත.

හිමිනම කළ පැමිණිල්ලේ මෙම තොරතුරු සඳහන් වන්නේ යැයි ප්‍රදේශයේ උසස් පොලිස් නිලධාරියෙක් ලංකාදීපයට පැවැසීය.

හිමිනම ගෙන් පැහැර ගත්තේ යැයි කියන ජංගම දුරකථනය ගල්ලෙන ආසන්නයේ තිබී පොලීසිය සොයාගෙන තිබේ.